Սիմոնյանը կամ Պրյադկինը կդառնան ՌՖՄ ղեկավարի պաշտոնակատար` Տոլստիխի հրաժարականի դեպքում. Ռոգաչյով

ԵՐԵՎԱՆ, 29 ապրիլի. /Նովոստի–Արմենիա/. Ռուսաստանի ֆուտբոլային միության առաջին փոխնախագահ Նիկիտա Սիմոնյանը կդառնա կազմակերպության պաշտոնակատար` Նիկոլայ Տոլստիխի հրաժարականի դեպքում, եթե Սիմոնյանը հրաժարվի, ապա պաշտոնակատարի տեղը կզբաղեցնի  ՌՖՊԼ նախագահ Սերգեյ Պրյադկինը, «Р-Спорт»–ին է հայտնել ՌՖՄ իրավաբանական կոմիտեի փոխնախագահ Դենիս Ռոգաչյովը։

Չորեքշաբթի ՌՖՄ գործադիր կոմիտեի նիստում որոշում է ընդունվել համաժողովի օրակարգում ընդգրկել ՌՖՄ նախագահ Նիկոլայ Տոլստիխի հրաժարականի հարցը։ ՌՖՄ հերթական համաժողովը կանցկացվի Մոսկվայում մայիսի 31–ին։

«Տոլստիխի հեռանալու դեպքում ՌՖՄ նախագահի պարտականությունները կատարողի տեղը կզբաղեցնի Նիկիտա Պավելի Սիմոնյանը։ Պարտականությունները կատարելուց հրաժարվելու դեպքում կլինի նա, ով ավելի երկար է փոխնախագահ եղել։ Դա Սերգեյ Պրյադկինն է,– ասել է Ռոգաչյովը։ – Նոր նախագահի ընտրությունների ժամկետների վերաբերյալ արտահերթ հաշվետու–ընտրական համաժողովին դժվար է ասել, թե ինչպես կորոշի գործադիր կոմիտեն։ Ենթադրում եմ, որ ընտրությունները կարող են նշանակել սեպտեմբերին։ Մի խոսքով` միջակայքը հուլիսի վերջից մինչև սեպտեմբերն է»։

Ռոգաչյովը հնչեցրել է այն պայմանները, որոնց դեպքում ընտրությունները լեգիտիմ կհամարվեն։ «Որպեսզի համաժողովի որոշումները լեգիտիմ համարվեն, դրան պետք է ներկա լինեն ՌՖՄ անդամների կեսից ավելին։ Ինչպես ցույց է տալիս պրակտիկան, համաժողովներին ներկայանում է գրեթե 100 տոկոսը»,– նկատել է նա, հաղորդում է «ՌԻԱ Նովոստին»։

«Այնուհետև ամեն ինչ որոշվում է ձայների մեծամասնությամբ։ Եթե մեծամասնությունը կողմ է լիազորությունների դադարեցմանը, ապա քվեարկության ավարտի պահից այն ուժի մեջ է մտնում։ Մենք առաջին անգամ ծրագրում ենք էլեկտրոնային քվեարկություն` կոճակ սեղմելու միջոցով»,– ասել է Ռոգաչյովը։ -0-