ԵՐԵՎԱՆ, 13 նոյեմբերի. /Նովոստի–Արմենիա/. Հայաստանի ֆուտբոլի հավաքականը պետք է հայ մարզիչ ունենա, կարծում է «Արարատ-73» լեգենդար ֆուտբոլային ակումբի վետերան Արկադի Անդրեասյանը։
«Ասեմ ձեզ հետևյալը, իմ անձնական կարծիքն է, կարող է` սուբյեկտիվ է, բայց կյանքը ցույց է տվել, որ եթե դու չգիտես լեզուն և թարգմանչի միջոցով ես շփվում, ապա միևնույն է` չես կարող մինչև վերջ հասցնել միտքդ քո սանին»,– ասաց Անդրեասյանը` «Նովոստի–Արմենիա» գործակալության խնդրանքով գնահատելով Հայաստանի հավաքականի շվեյցարացի մարզիչ Բեռնար Շալանդի աշխատանքը։
Ըստ նրա, լեզու չիմանալով` հնարավոր չէ բացատրել ֆուտբոլի բոլոր նրբությունները, ինչպես նաև հնարավոր չէ հասկանալ խաղացողի հոգեբանությունը։
«Եթե ցանկանում ես մարզել մարդուն, պետք է հասկանաս նրա հոգեբանության բոլոր նրբությունները, իսկ դրա համար պետք է շփվել ֆուտբոլիստների հետ մայրենի լեզվով»,– ավելացրեց Անդրեասյանը։ -0-
