Հայաստանի ազգային հավաքականի և Դոնեցկի «Շախտյորի» կիսապաշտպան Հենրիխ Մխիթարյանը պարգևատրվել է ԼՂՀ վարչապետի մեդալով

Հայաստանի ազգային հավաքականի և Դոնեցկի «Շախտյորի»  կիսապաշտպան Հենրիխ Մխիթարյանը պարգևատրվել է ԼՂՀ վարչապետի մեդալով, հաղորդում է Հայաստանի ֆուտբոլի ֆեդերացիայի մամուլի ծառայությունը:

Դեկտեմբերի 14-ին ԼՂՀ մայրաքաղաք Ստեփանակերտում կայացել է «Արցախի ազատամարտիկների միության» 5-րդ համաժողովը, որին ներկա են եղել նաև ՀՖՖ նախագահ Ռուբեն Հայրապետյանը և Հայաստանի ազգային հավաքականի կիսապաշտպան Հենրիխ Մխիթարյանը:

«Համաժողովի ավարտին գեներալ-մայոր Սամվել Կարապետյանը ՀՖՖ նախագահ Ռուբեն Հայրապետյանին պարգևատրել է ԼՂՀ «Հայրենյաց պաշտպան» մեդալով, իսկ Հենրիխ Մխիթարյանն արժանացել է ԼՂՀ վարչապետի մեդալի»,- ասվում է հաղորդագրության մեջ:
Համաժողովի շրջանակներում Մխիթարյանը ԼՂՀ ազատամարտիկների 15 ընտանիքներին կենցաղային տեխնիկա (հեռուստացույցեր, լվացքի մեքենաներ և սառնարաններ) է նվիրել:
Հայկական ֆուտբոլի աստղն արդեն երկրորդ տարին անընդմեջ բարեգործական առաքելությամբ Ստեփանակերտ է այցելում: -0