ԵՐԵՎԱՆ, 14 դեկտեմբերի. /Նովոստի-Արմենիա/. Կամերունի ֆուտբոլի հավաքականի կապիտան և Մախաչկալայի «Անժիի» հարձակվող Սամյուել Էտո’Օ-ն յոթ խաղերի համար հեռացվել է ազգային թիմից, հայտնում է supersport.com պորտալը՝ հղում անելով Կամերունի ֆուտբոլի ֆեդերացիայի (FCF) աղբյուրին:
FCF-ի կարգապահական կոմիտեն որոշում է կայացրել երկուշաբթի անցած լսումներից հետո: Կոշտ պատժամիջոցը պայմանավորված է բոյկոտից հետո, որի մասին հայտարարել է Էտո’Օ-ն նոյեմբերի կեսերին՝ հրաժարվելով մասնակցել Անգոլայի հետ ընկերական խաղին: Բացի Էտո’Օ-ից, կարգապահական պատժամիջոցների են ենթարկվել հոլանդական «Այաքսի» կիսապաշտպան Էյոնգ Էնոն (4 խաղ) և անգլիական «Թոթենհեմի» պաշտպան Բենուա Ասու-Էկոտոն (3 խաղ), հաղորդում է supersport.com-ը:
Էնոն և Էտո’Օ-ն իրենց որոշումը բացատրել են նրանով, որ իրենք չեն ստացել իրենց ազգային ֆեդերացիայի կողմից Մարոկոյում նոյեմբերի 11-13-ն անցկացված LG Cup-ում հաղթանակի համար խոստացված բոնուսները: Մինչդեռ Ասու-Էկոտոն պատժվել է Մարոկոյի մրցաշարին մասնակցելուց հրաժարվելու համար:
Կամերունի հավաքականը չորեքշաբթի ընկերական հանդիպում կանցկացնի Անգոլայի հետ: Խաղի մասնակիցների ցուցակում, որը հրապարակվել է ֆեդերացիայի պաշտոնական կայքում, վերոնշյալ ֆուտբոլիստների անունները չկան: Տվյալ պահին կամերունյան հավաքականի խաղացանկում գրանցված է 5 խաղ՝ Անգոլայի, Գվինեա-Բիսաուի (երկու անգամ), Կոնգոյի և Լիբիայի հավաքականների հետ: -0-
