Գերմանիան ներկայացնող հայ բռնցքամարտիկ, աշխարհի նախկին չեմպիոն Արթուր Աբրահամը վստահ է, որ կհաղթի 23-ամյա արգենտինացի Պաբլո Ֆարիասին, «Նովոստի-Արմենիա» գործակալությանը հայտնեց Աբրահամի մամուլի քարտուղար Սիրան Գրիգորյանը:
Արթուր Աբրահամի առաջիկա որակավորման մենամարտը նշանակված է 2012 թվականի հունվարի 14-ին, Գերմանիայի Օֆֆենբուրգ քաղաքում:
«Լավ մարզավիճակում եմ, հաղթանակն անխուսափելի է: Մեծ աշխատանք եմ տարել նախորդ մենամարտերում սխալներս վերացնելու ուղղությամբ: 2012-ն ինձ համար նոր հաղթանակների սկիզբ է լինելու: Դիտարժան մրցելույթ եմ խոստանում բռնցքամարտի սիրահարների համար»,- Արթուր Աբրահամի խոսքն է մեջբերում Գրիգորյանը:
Հայ անվանի բռնցքամարտիկը շարունակում է իր մարզչի` Ուլի Վեգների հետ նույն թիմում աշխատել: Ուլի Վեգները ևս մեծ սպասելիքներ ունի Արթուր Աբրահամից` կապված 2012-ին ռինգ վերադանալու հետ:
Allboxing.ru պորտալի տվյալներով՝ Պաբլո Ֆարիասի մարզական կենսագրությունում 19 մենամարտ և մեկ պարտություն է արձանագրվել:
Արթուր Աբրահամը (Ավետիք Աբրահամյան) ծնվել է 1980 թվականի փետրվարի 20-ին Երևանում: Գերմանիայի մայրաքաղաք Բեռլինում բնակվում է 2004 թվականից: ՀՀ քաղաքացի լինելուց բացի` 2005 թվականից ունի նաեւ Գերմանիայի քաղաքացիություն: Իր մարզական կարիերայի ընթացքում ունեցել է 35 մենամարտ, որոնցից 32-ում հաղթել է` համաշխարհային դասակարգման աղյուսակներում նվաճելով առաջատար հորիզոնականներ: -0-
