Մրցավարը սխալվեց՝ դաշտից հեռացնելով Հայաստանի հավաքականի դարպասապահ Բերեզովսկուն. Սայմոն Քոքս

Իսպանացի մրցավար Ւտուրալդո Գոնսալեսը սխալվել է՝ ընտրական В խմբի Իռլանդիա-Հայաստան վճռորոշ խաղի ժամանակ խաղից հեռացնելով Հայաստանի ֆուտբոլի հավաքականի դարպասապահ Ռոման Բերեզովսկուն, հայտարարել է իռլանդացիների հարձակվող Սայմոն Քոքսը BBC հեռուստաալիքին տված հարցազրույցում, հաղորդում է «ՌԻԱ Նովոստին»:

Խաղի 26-րդ րոպեին Գոնսալեսը դաշտից հեռացրեց հայկական հավաքականի դարպասապահ Ռոման Բերեզովսկուն, քանի որ նա տուգանային հրապարակի սահմաններից դուրս իբր ձեռքով խաղաց: Սակայն կրկնապատկերի ժամանակ պարզ երևում էր, որ գնդակը դարպասապահի ձեռքին չի դիպել: Ավելին, գրոհի ժամանակ իռլանդացիների հարձակվող Սայմոն Քոքսը ձեռքով խաղաց: BBC-ին տված հարցազրույցում Քոքսը խոստովանեց, որ գնդակը դիպել է իր ձեռքին:

«Չեմ կարծում, որ դարպասապահը (Բերեզովսկին) ձեռքով է խաղացել, այդ պատճառով մրցավարի որոշումը չափազանց խիստ էր», - ասել է Քոքսը: «Սակայն մենք արժանի էինք այս հաղթանակին, քանի որ խաղում էինք հերոսների նման: Սա անմոռանալի երեկո էր իռլանդական ֆուտբոլի համար»:

Իռլանդացիների գլխավոր մարզիչ Ջովանի Տրապատոնին, արժանին մատուցելով Հայաստանի հավաքականի առաջընթացին, նշել է, որ «տրամադրվածությունը, հոգեբանական կայունությունն ու սեփական ուժերի նկատմամբ հավատը» թույլ տվեցին իր ֆուտբոլիստներին կորզել հաղթանակը՝ չնայած դժվարություններին, որոնց հանդիպեց թիմն առաջին խաղակեսում:

Հանդիպման վերջում խաղից հեռացվեց իռլանդացիների հարձակվող Քևին Դոյլը, և Գոնսալեսի այս որոշումը Տրապատոնին բավականին վրդովմունքով ընդունեց: «Լայնսմենը ասաց, որ նա արմունկով էր խաղացել: Ես դրանում համոզված չեմ: Դա Քևին Դոյլի ոճը չէ», - հայտարարել է իտալացին:

Իռլանդացիները Պորտուգալիայի, Խորվաթիայի և Չեխիայի հետ միասին  կշարունակեն պայքարը Եվրո-2012-ի եզրափակչի ուղեգրի համար: Հանդիպումների վիճակահանությունը տեղի կունենա հինգշաբթի:-0-