Յուրա Մովսիսյանն օգնել է «Կրասնոդարին» ջախջախել «Տոմին»

Ռուսաստանի առաջնության 24-րդ մրցաշարի մեկնարկային խաղում Տոմսկի «Տոմի» ֆուտբոլիստներն իրենց դաշտում խոշոր պարտություն են կրել «Կրասնոդարից»՝ 0:4 հաշվով: «Կրասնոդարի» կազմում աչքի է ընկել Հայաստանի հավաքականի հարձակվող Յուրա Մովսիսյանը:

Խաղի 39-րդ րոպեին խաղի հաշիվը բացել է կրասնոդարցիների կիսապաշտպան Ժոազինյոն, հաղորդում է «ՌԻԱ Նովոստին»:

Երկրորդ խաղակեսին «Կրասնոդարի» թիմում փոխարինելու են դուրս եկել Ալեքսանդր Երոխինը, Յուրա Մովսիսյանը և Ռույ Միգելը, և երեքն էլ կարողացել են աչքի ընկնել:

Խաղի 55-րդ րոպեին «ստանդարտ» իրադրությունից հետո Նեմանյա Տուբիչը գլխի հարվածով գնդակը նետել է տուգանային հրապարակի կենտրոն, և Երոխինը շեշտակի հարված է հասցրել դարպասի հեռավոր անկյուն: Այդ գնդակն առաջինն է դարձել կրասնոդարյան թիմի 21-ամյա կիսապաշտպանի համար:

Մովսիսյանը լրացուցիչ ավելացված երկրորդ րոպեին տուգանային հարված է իրացրել այն բանից հետո, երբ «Տոմի» պաշտպաններից մեկն իր տուգանայինում ձեռքով է խաղացել: Երկու րոպե անց խաղը եզրափակել է պորտուգալացի Ռույ Միգելը՝ Մարցվալաձեի փոխանցումից հետո գնդակն ուղղելով  «Տոմի» դարպասապահ Սերգեյ Պեսյակովի դարպասը:

Հաջորդ մրցափուլում Տոմսկի թիմը կխաղա Պետերբուրգի «Զենիթի» հետ, իսկ կրասնոդարցիները կընդունեն մոսկովյան «Սպարտակին»: -0-