ՌԴ հավաքականի ֆուտբոլիստ Ռոման Շիշկինը հուսով է, որ Հայաստանի դեմ Եվրո-2012 ընտրական փուլի մրցախաղում ազգային թիմում խաղալու հրավեր կստանա, հաղորդում է ՌԻԱ Նովոստին։
Փետրվարի 9-ին Աբու Դաբիում (ԱՄԷ) ՌԴ հավաքականն ընկերական մրցախաղ կանցկացնի իրանցիների հետ։ Իսկ մարտի 26-ին Եվրոպայի առաջնության ընտրական մրցախաղի շրջանակներում Դիկ Ադվոկատի սաները պետք է խաղան ՀՀ հավաքականի հետ։ Ռոման Շիշկինի համար ՌԴ հավաքականում Իրանի դեմ խաղալու հրավերն իր կարիերայում երկրորդն է։ Առաջինը նա ստացել է նաև ընկերական մրցախաղում՝ անցած տարվա նոյեմբերին բելգիացիների հետ։
«Սա նույնպես ընկերական մրցախաղ է, ինչպես Բելգիայի դեպքում, բայց ինձ՝ որպես երիտասարդ խաղացողի միշտ հաճելի է ՌԴ հավաքականում խաղալ։ Քանի որ ՌԴ հավաքականը ցանկացած ռուս խաղացողի համար մեկ թիմ է։ Հավաքականի և Հայաստանի հետ խաղի հրավերի հույս ունեմ։ Բայց ամեն ինչ առաջին հերթին ինձանից է կախված, թե ինչպես կխաղամ ակումբի համար։ Եթե պատշաճ կերպով ներկայանամ, ապա, հուսով եմ՝ կկանչեն»,- երկուշաբթի լրագրողներին է պատմել Շիշկինը։
Ոչ այդքան ուժեղ մրցակցի դեմ այդ ընկերական հանդիպմանը խաղալու անհրաժեշտության մասին դատողություններ անելիս՝ Շիշկինը նշեց, որ ֆուտբոլիստները «կախյալ մարդիկ են»։
«Քանի որ որոշել են անցկացնել այդ մրցախաղը, նշանակում է՝ որոշակի նպատակներ են հետապնդում։ Հնարավոր է՝ ՌՖՄ-ը (Ռուսական ֆուտբոլային միությունը) կամ գլխավոր մարզիչն է որոշել, հնարավոր է՝ փորձում են ինչ-որ նոր խաղացողներ, նոր կապեր, ֆուտբոլիստների միջև գործակցություններ գտնել։ Նշանակել են խաղը, ուրեմն նշանակել են։ Մենք եկանք, խաղացինք և ոչ մի խնդիր չկա»,- ասաց նա։
«Լոկոմոտիվ»-ի խաղացողն ավելացրել է, որ Բելգիայի հետ ունեցած խաղից հետո (0։2), որն ազգային թիմի կազմում նրա համար առաջինն էր, Ադվոկատը նրա հետ չի խոսել։ «Բոլորը ճնշված տրամադրություն ունեին։ Անմիջապես մեկնեցին, այդ պատճառով ոչ մի մեկնաբանություններ չեն եղել։ Ես լսել եմ այլ մասնագետների գնահատականները, այն էլ թերթերից»,- պատմեց Շիշկինը։
ՌԴ հավաքականի խաղացողն իր պատրաստվածությունը 70 տոկոս է գնահատել։ «Ես հեռացա երկրորդ հավաքից, մարզիչը («Լոկոմոտիվ»-ի) ստիպված էր դրության մեջ մտնել, բայց ամեն ինչ նորմալ է։ Այժմ դժվար է ասել՝ ինչ մարզավիճակում եմ։ Երկրորդ հավաքը վերջերս է սկսվել, միայն մեկ մրցախաղ եմ խաղացել՝ 90 րոպե։ Դեռ մարզվում եմ»,- ասաց նա։ -0-
