Առաջին գերթեթև քաշում բռնցքամարտի աշխարհի բացարձակ չեմպիոն Վիկ Դարչինյանը լրջորեն պատրաստվում է IBF-ի 53,5 կգ քաշային կարգում գործող չեմպիոն «Քինգ Քոնգ» մականունով Ջոզեֆ Ագբեկոյի հետ հունիսի 6-ին ծրագրված մարտին։
«Ագբեկոն շատ լավ ու բավականին դժվար մրցակից է։ Ես արդեն սկսել եմ դիտել նրա մարտերի ձայնագրություններն ու ուսումնասիրել մարտավարությունը»,- ուրբաթ Դարչինյանն ասաց «Նովոստի-Արմենիա» գործակալությանը։
Դարչինյանը հայտնեց, որ արդեն մեկ շաբաթից պետք է վերադառնա Ավստրալիա և սկսի պատրաստվել մարտին, որի առանձնահատկությունն այն կլինի, որ մարտը կկայանա նոր քաշային կարգում։
Միևնույն ժամանակ բռնցքամարտիկն ընդգծեց, որ ներկայում մարտի անցկացման վերջնական պայմանագիրը դեռ կնքված չէ, սակայն մարտիկներից երկուսի մենեջերներն էլ համաձայնություն են տվել։
Հայ բռնցքամարտիկ Վախթանգ Դարչինյանը IBF, WBA, WBC վարկածներով չեմպիոնական գոտեկիր է։
Վիկ (Վախթանգ) Դարչինյանը ծնվել է 1976 թ.-ին՝ Վանաձոր քաղաքում (Լոռու մարզ), 2001 թ.-ից պորֆեսիոնալ բոքսում ելույթ է ունենում Ավստրալիայի դրոշի տակ։ Արժանացել «Կատաղի ցուլ» անվանը։-0-
Վիկ Դարչինյանը գերթեթև քաշային կարգում (մինչև 50,8 կգ) IBF և IBO վարկածներով աշխարհի չեմպիոնական տիտղոսը նվաճել է 2004 թ.-ին։ Ֆիլիպինցի Նոնիտո Դոների հետ պայքարում պարտվելուց հետո նա 2007 թվականի աշնանն անցավ հաջորդ քաշային կարգ։
Պրոֆեսիոնալ ռինգում Դարչինյանն ունեցել է 34 մենամարտ։ Նրա հաշվում 32 հաղթանակ կա, որոնցից 26-ը՝ նոկաուտով, մեկ ոչ ոքի, մեկ պարտություն։
Ագբեկոն ամենաթեթև քաշում IBF տիտղոսակիր է 2007 թ.-ի սեպտեմբերից, և առայժմ հասցրել է ընդամենը մեկ անգամ պաշտպանել իր գոտին։ Նա հարվածը լավ պահելու հատկությամբ է առանձնանում և 26 հաղթանակած մարտերից 22-ը հատկացված ժամանակից շուտ է ավարտել։ Ագբեկոյի, ինչպես և Վիկ Դարչինյանի ակտիվում ընդամենը մեկ պարտություն կա։ --0--
