«Սթար» ընկերությունը կհովանավորի Հայաստանի ֆուտբոլի առաջնությունը
«Սթար» սուպերմարկետների ցանցը կհովանավորի Հայաստանի ֆուտբոլի ազգային առաջնությունը, չորեքշաբթի լրագրողներին հայտնեց Հայաստանի Ֆուտբոլի ֆեդերացիայի նախագահ Ռուբեն Հայրապետյանը։
Համգործակցության պայմանագիրը ստորագրել են Հայրապետյանը և «Սթարի» գործագիր տնօրեն Վահան Քերոբյանը։ «Հայաստանի բարձրագույն լիգան կկոչվի «Սթար- Հայաստանի ազգային առաջնություն»,- ասաց ՀՖՖ նախագահը։ Հայրապետյանի խոսքերով, բացի բարձրագույն լիգայում համագործակցելուց, «Սթարը» կդառնա Հայաստանի ֆուտբոլի ազգային հավաքականի գործընկերը։
«ՀՖՖ-ի և «Սթարի» համագործակցությունը ուղղված է Հայաստանում ֆուտբոլի զարգացմանը»,- նկատեց նա։ ՀՖՖ նախագահը նշեց, որ ֆեդերացիայի գործադիր կոմիտեի նիստին «Սթար» ընկերության կողմից տրամադրված գումարը կբաժանվի ֆուտբոլային ակումբների միջև։
Ընդ որում նա հրաժարվեց ասել պայմանագրի գումարի չափը՝ ասելով, որ դա առևտրային գաղտնիք է։ Քերոբյանն իր հերթին նշեց, որ «Սթարի» համար մեծ պատիվ է աջակցել Հայաստանի ֆուտբոլին։
«Ֆուտբոլն ամենահայտնի և ամենատարածված սպորտաձևն է, և մենք ուրախ ենք, որ մեր անունը կներկայացվի առաջնությանը»,- ասաց նա։ Քերոբյանը չբացառեց, որ հետագայում «Սթարը» կհովանավորի նաև այլ սպորտաձևերի առաջնությունը։
Հայաստանի ֆուտբոլի 17-րդ ազգային առաջնությունը բարձրագույն լիգայում մեկնարկեց ապրիլի 6-ին։ Վերջին՝ 28-րդ փուլը, տեղի կունենա նոյեմբերի 15-ին։ Առաջնությանը մասնակցում է ութ հայկական ակումբ՝ «Փյունիկը», «Բանանցը», «Միկան», «Արարատը», «Գանձասարը», «Շիրակը», «Ուլիսսը» և «Կիլիկիան»։--0-
