«Ամբեր» շախմատի մրցաշարի չորրորդ փուլից հետո Լևոն Արոնյանը կրկին առաջատարների եռյակում է

Նիցցայում ընթացող «Ամբեր-2008» շախմատի միջազգային մրցաշարի չորրորդ փուլի արդյունքներով՝ հայ գրոսմայստեր Լևոն Արոնյանը, ուկրաինացի Վասիլի Իվանչուկը և բուլղարացի Վեսելին Տոպալովը կիսում են առաջին-երրորդ տեղերը։

Ինչպես չորեքշաբթի «Նովոստի-Արմենիա» գործակալությանը տեղեկացրեցին Հայաստանի շախմատի ֆեդերացիայից, նախօրեին Արոնյանը «կույր» հանդիպման ժամանակ ոչ-ոքի է խաղացել նորվեգացի գրոսմայստեր Մագնուս Կառլսենի հետ, իսկ «արագ» հանդիպման ժամանակ հաղթանակ է տարել նրա նկատմամբ։

Չորս փուլերից հետո Արոնյանը, Իվանչուկը և Տոպալովը ունեն 5-ական միավոր, նվազագույն տարբերությամբ նրանց է հետևում աշխարհի չեմպիոն, հնդիկ Վիշվանաթան Անանդը։

Չորսական միավորով Վլադիմիր Կրամնիկը (Ռուսաստան), Պետեր Լեկոն (Հունգարիա) և Կառլսենը կիսում են հինգից յոթերորդ տեղերը։ Կես միավոր պակաս ունեն ուկրաինացի Սերգեյ Կարյակինը, Շահրիար Մամեդյարովը (Ադրբեջան) և Լյուկ Վան Վելինը (Նիդեռլանդներ)։

Երեքական միավորով առաջնության աղյուսակը եզրափակում են Ալեքսանդր Մորոզևիչը (Ռուսաստան) և Բորիս Գելֆանդը (Իսրայել)։

Մարտի 19-ին ազատ օր է, հինգերորդ փուլը տեղի կունենա մարտի 20-ին։

«Ամբեր-2008» 17-րդ միջագային շախմատի մրցաշարն  անցկացվում է Նիցցայում (Ֆրանսիա)՝ 2008 թ. մարտի 15-27-ը՝ երկու շրջանով։

Յուրաքանչյուր փուլում հեղինակավոր առաջնության մասնակիցները ունենում են մեկական հանդիպում՝ մեկ «արագ» և մեկ «կույր»։ Ընդհանուր մրցանակային ֆոնդը կազմում է 216 հազ. եվրո։-0-