ԵՐԵՎԱՆ, 28 դեկտեմբերի. /Նովոստի-Արմենիա/. Ուրբաթ Չեխիայի Նովե Մեստո վայրում մեկնարկում է պատմության մեջ երկրորդ «Տուր դե Սկի» դահուկային մրցարշավի ամանորյա սերիան։
Մրցարշավի 10 օրերի ընթացքում կխաղարկվի մրցանակների 16 փաթեթ՝ 8-ական տղամարդկանց և կանանց համար։ Դահուկորդներին կտրվի միայն երկու ազատ օր՝ դեկտեմբերի 31-ը և հունվարի 3-ը, հաղորդում է «ՌԻԱ Նովոստին»։
Դեկտեմբերի 28-ին Նովե Մեստոյում սերիան կսկսվի «դասական» նախաբանով (3 կմ՝ կանանց մոտ և 4,5 կմ՝ տղամարդկանց), իսկ հաջորդ օրը տեղի կունենան հետապնդման մրցարշավները։ «Տուրի» չեխական փուլը կավարտվի դեկտեմբերի 30-ին Պրահայում կայանալիք սպրինտերական մրցարշավներով։
2008 թ.-ի առաջին օրը դահուկորդները կրկին կվերադառնան Նովե Մեստո, որտեղ տեղի կունենան դուատլոն ոճով մրցարշավները (կանանց մոտ՝ 5 կմ դասական + 5 կմ ազատ ոճով, տղամարդկանց մոտ՝ 10+10 կմ), իսկ հունվարի 2-ին նույն տեղում կկայանան դասական ոճի մրցարշավները՝ 10 և 15 կմ-ով։
Հունվարի 4-ին «Տուրը» կշարունակվի արդեն Իտալիայում. Ասյագոյում կկայանա սպրինտերայի նոր փուլը։ Մրցարշավների հանգուցալուծումը տեղի կունենա Վալ-դի-Ֆյեմայում։ Հունվարի 5-ին այնտեղ կկայանա ևս մեկ դասական փուլ՝ կանանց մոտ 10 կմ և տղամարդկան մոտ 20 կմ։ «Տուր դե Սկին» կավարտվի հանդիկապով ազատ ոճի մեջ մրցարշավով. մասնակիցները կմեկնարկեն սերիայի ընդհանուր հաշվում ունեցող տեղերի համաձայն։
Անցած տարի ձյան բացակայության պատճառով կրճատված տարբերակով տեղի ունեցած պատմության մեջ առաջին «Տուր դե Սկիի» հաղթողներն են գերմանացի Թոբիաս Անգերերը և Վիրպի Կույտունեն՝ Ֆինլանդիայից։ Այժմ նրանք դիտարկվում են որպես սերիայի ֆավորիտներ։ Սպասվում է, որ Անգերերի հետ մրցակցության մեջ կմտնեն նորվեգացիներ Տոր-Առնե Էթլանդը, Պետեր Նորտխուգը, Սիմեն Էստենսենը, ինչպես նաև ռուս Ալեքսանդր Լեգկովը, որը անցած տարի երկրորդ տեղն է զբաղեցրել։ Կույտունենի հետ հաղթանակի համար կարող են մրցել նրա հայրենակից Այնո-Կայսա Սաարինեն, նորվեգացիներ Մարիտ Բյորգենը և Կրիստին Ստեյրան, սլովենուհի Պետրա Մայդիչը և ուկրաինուհի Վալենտինա Շեվչենկոն։
Ներկայիս սերիայի մրցանակային ֆոնդը կազմում է 1 միլիոն շվեյցարական ֆրանկ (մոտ 600 հազ. եվրո)։ Նրա մեծ մասը կբաշխվի ընհանուր հաշիվ մուտք գործած առաջատարների տասնյակի շրջանում, իսկ «Տուր դե Սկիի» կանանց և տղամարդկանց շրջանում հաղթողները կստանան 150 հազ. ֆրանկ։ Յուրաքանչյուր փուլում հաղթելու համար դահուկորդները կստանան 5 հազարական ֆրանկ։-0-
