Հայաստանում բացվել է ԱՊՀ և Բալթյան երկրների Ազգային օլիմպիական կոմիտեների նախագահների և սպորտի ոլորտում առաջատար մասնագետների սեմինարը

ԵՐԵՎԱՆ, 7 նոյեմբերի. /Նովոստի-Արմենիա/. Ծաղկաձոր հանգստյան քաղաքում մեկնարկել է ԱՊՀ և Բալթյան երկրների Ազգային օլիմպիական կոմիտեների նախագահների և սպորտի ոլորտում առաջատար մասնագետների սեմինար-խորհրդակցությունը։ Ինչպես միջոցառման բացման արարողության ժամանակ նշեց Հայաստանի սպորտի նախարար Արմեն Գրիգորյանը, նման հանդիպումները կարևոր նշանակություն ունեն։

Նախարարը տեղեկացրեց, որ սեմինարի անցկացման գաղափարը ծնվել է 2006 թ.-ին Լատիվայում ԱՕԿ-ի նախագահների հանդիպման ժամանակ։ Նրա խոսքերով, բացի Հայաստանից այս սեմինարի անցկացման վայրի համար հավակնող-երկրների թվում էին նաև Մոլդովան և Վրաստանը, սակայն ընտրվեց Հայաստանը։ «Սեմինարի ընթացքում կքննարկվեն 2008 թ.-ին Պեկինում կայանալիք ամառային օլիմպիական խաղերին երկրների մասնակցությանն առնչվող հարցեր, ինչպես նաև կներկայացվեն տարբեր ծրագրեր», - ասաց Գրիգորյանը։

 Հայաստանի ազգային օլիմպիական կոմիտեի նախագահ Գագիկ Ծառուկյանը իր հերթին, մաղթելով սեմինարի մասնակիցներին բեղմնավոր և ստեղծագործական աշխատանք, նշեց, որ սեմինարի ընթացքում կներկայացվեն նոր գաղափարներ, մշակված ծրագրեր Օլիմպիադային մասնակցելու համար։

Նա նաև պատրաստակամություն հայտնեց ընդունել տարբեր երկրների մարզիկներ՝ Ծաղկաձորի օլիմպիական բազայում մարզումներ անցակցնելու համար։

Միջոցառման շրջանակներում նախատեսված են, մասնավորապես, 2008 թ.-ին Պեկինում կայանալիք Օլիմպիական խաղերի կազմակերպչական կոմիտեի Եվրոպայի համակարգող Գոու Ռոուռոուի և  Ռուսաստանի օլիմպիական կոմիտեի միջազգային կապերի վարչության պետ Ալեքսանդր Գորշկովի զեկույցները։ Խորհրդակցության մասնակիցները կծանոթանան նաև Հայաստանի ԱՕԿ գործունեության որոշ ոլորտներին, ինչպես նաև Երևանի մարզական շինություններին։-0—