ԵՐԵՎԱՆ, 23 հոկտեմբերի./Նովոստի-Արմենիա/.Անդրկովկասի պատմության մեջ առաջին անգամ Երևանում նոյեմբերի 10-ին տեղի կունենա ձյուդոյի միջազգային «Գրան-պրի» մրցույթը։ Միջոցառումը նվիրված է Երևանի «Արարատ» կոնյակի-գինու-օղու գործարանի 130-ամյակին։
Ինչպես երեքշաբթի մամուլի ասուլիսում տեղեկացրեց պատգամավոր, Հայաստանի ազգային օլիմպիական կոմիտեի նախագահ Գագիկ Ծառուկյանը, «Գրան-պրի» մրցույթին մասնակցելու համար Երևան կժամանեն աշխարհի ուժեղագույն ձյուդոիստները։
«Երևան կժամանեն ձյուդոիստներ 11 երկրներից, մասնավորապես Ռուսաստանից, Մեծ Բրիտանիայից, Իրանից, Կորեայից, Բելառուսից, Վրաստանից, Հոլանդիայից։ Մենք հրավիրել ենք ամենահայտնի սպորտսմենների, Օլիմպիական խաղերի, աշխարհի և Եվրոպայի առաջնությունների մրցանակակիրների և չեմպիոնների»,-նշեց Ծառուկյանը։
Նրա խոսքերով, հյուրի կարգավիճակով մրցույթին հրավիրվել են Ձյուդոյի միջազգային ֆեդերացիայի նախագահ Մարիուս Վիզերը և Ձյուդոյի եվրոպական ֆեդերացիայի նախագահ Սերգեյ Սոլովեյչիկը։
«Գործարանի հոբելյանի տոնակատարության և մրցույթի անցկացման կապակցությամբ Հայաստան կժամանեն աշխարհի 20 երկրներից ավելի քան 500 հյուրեր։ Հրավիրվածների թվում են իշխանական կառույցների, քաղաքականության, բիզնեսի խոշոր ներկայացուցիչները, ռուսաստանյան և միջազգային բիզնեսի առաջատարները»,-ասաց Ծառուկյանը։
ԱՕԿ-ի նախագահը հայտարարեց, որ մրցույթը նշանակալի իրադարձություն կլինի Հայաստանի սպորտային կյանքում և ուղիղ եթերով կհեռարձակվի ողջ աշխարհում։ «Մեր երկրում սպորտի զարգացման համար անհրաժեշտ է բաց լինել բոլոր նման միջոցառումների առջև»,-ընգծեց Ծառուկյանը։
Նրա խոսքերով, մրցույթի ընդհանուր մրացանակային հիմնադրամը կազմում է 100 հազ. ԱՄՆ դոլար։ Հաղթողներին շնորհվելու են ոսկե, արծաթե և բրոնզե մեդալներ։
Հայաստանը մրցույթում ներկայացնելու են վեց ձյուդոիստներ՝ Հովհաննես Դավթյանը, Աշոտ Վարդիկյանը (60 կգ.), Արմեն Նազարյանը, Մեսրոպ Բարբարյանը (66 կգ.), Ղազարոս Գրիգորյանը և Հովհաննես Մաթևոսյանը (81 կգ.)։
Սպորտային մրցույթներից բացի, հանդիսատեսները գունեղ շոուի և հայ էստրադայի աստղերի մասնակցությամբ համերգային ծրագրի ականատեսը կլինեն։
Հայաստանում ձյուդոյի «Գրան-պրի» մրցույթի նախաձեռնողը Հայաստանի ազգային օլիմպիական կոմիտեի նախագահ Գագիկ Ծառուկյանն է։
«Գրան-պրին» Եվրոմիության ձյուդոյի զարգացման նոր տեսլականի քայլերից մեկն է, որի համաձայն աշխարհի մի շարք քաղաքներում անցկացվելու են գունեղ, տպավորիչ մրցույթներ, իսկ վերջում ներկայացվելու է «մաստերս» որակավորման մրցույթը։--0--
