Ծանրորդ Գոռ Սահակյանը՝ երիտասարդների աշխարհի առաջնության բրոնզե մեդալակիր

05.05.2022, 13:48
Գոռ Սահակյան  բրոնզե մեդալ է նվաճել Ծանրամարտի աշխարհի երիտասարդական առաջնությունում
Ծանրորդ Գոռ Սահակյանը՝ երիտասարդների աշխարհի առաջնության բրոնզե մեդալակիր
ԵՐԵՎԱՆ, 5 մայիսի./Նովոստի–Արմենիա/. Հունաստանի Հերակլիոն քաղաքում ընթացող ծանրամարտի աշխարհի երիտասարդական առաջնությունում Հայաստանի ներկայացուցիչ, 67 կգ քաշային Գոռ Սահակյան բրոնզե մեդալ է նվաճել՝ երկամարտի 302 կգ արդյունքով:

Գոռ Սահակյանը պոկում վարժությունում առաջին մոտեցմամբ գլխավերևում պահել է 130 կգ կշռող ծանրաձողը, երկրորդ մոտեցմամբ պոկել է 135 կգ, իսկ երրորդ մոտեցմամբ՝ 137 կգ: Այս վարժության արդյունքներով Սահակյանը փոքր արծաթե մեդալ է նվաճել, հաղորդում է ՀՀ ԿԳՄՍՆ–ն:

«Հրում վարժությունում էլ հայ երիտասարդ ծանրորդը հաջող է կատարել առաջին երկու մոտեցումները՝ բարձրացնելով 160 և 165 կգ կշռող ծանրաձողերը: Երրորդ մոտեցումը Սահակյանը ձախողել է (170 կգ): Այս վարժությունում նա բրոնզե մեդալ է նվաճել», – նշվում է հաղորդագրության մեջ:

Երկամարտում ոսկե մեդալը նվաճել է Թաիլանդի ներկայացուցիչ Ուիրաֆոն Ուիչուման (311 կգ), իսկ արծաթե մեդալը՝ Թուրքիայի ներկայացուցիչ Յուսուֆ Գենցը (307 կգ):

Նշենք՝ երիտասարդների աշխարհի բրոնզե մեդալակիր Գոռ Սահակյանին պարգևատրել է ԿԳՄՍՆ սպորտի բարձրագույն նվաճումների բաժնի գլխավոր մասնագետ, միջազգային կարգի մրցավար Արայիկ Ալավերդյանը:

Ավելի վաղ Հայաստանի հավաքականի կազմում ոսկե մեդալ էր նվաճել Գառնիկ Չոլակյանը (55 կգ), իսկ Անդրանիկ Պապեյանը (61 կգ) զրո էր ստացել:

Մելիք Ղուկասյանի գլխավորությամբ մրցավայր է մեկնել ևս 6 ծանրորդ՝ Մնացական Աբրահամյանը (81 կգ), Սուրեն Գրիգորյանը, Գևորգ Ղահրամանյանը (երկուսն էլ՝ 89 կգ), Գարիկ Կարապետյանը (96 կգ), Պետրոս Պետրոսյանը (102 կգ) և Միլենա Խաչատրյանը (76 կգ):

Այսօր աշխարհի առաջնությունում պայքարի դուրս կգան 64 կգ քաշային կանայք:–0–