ԵՐԵՎԱՆ, 7 հոկտեմբերի. /Նովոստի–Արմենիա/. Ռումինիայի հավաքականի ավագ և կենտրոնական պաշտպան Դրագոշ Գրիգորեն ուրբաթ հայտարարեց, որ իր թիմին ֆավորիտ չի համարում Աշխարհի 2018 թ.–ի առաջնության ընտրական փուլի շրջանակում Հայաստանի հավաքականի հետ խաղում, որը կանցկացվի հոկտեմբերի 8–ին Երևանում։
«Մեզ ֆավորիտ չեմ համարում, սակայն վաղը մենք կանենք ամեն ինչ` երեք միավոր վաստակելու համար։ Մեր խմբի բոլոր խաղերը շատ կարևոր են, և յուրաքանչյուր հանդիպման ժամանակ մենք ձգտելու ենք հաղթանակի», – ասաց Գրիգորեն։
Մեկնաբանելով հայկական թիմում «Մանչեսթեր Յունայթեդի» կիսապաշտպան Հենրիխ Մխիթարյանի բացակայությունը` Գրիգորեն նշեց, որ հայ ֆուտբոլիստը մեծ խաղացող է, ով հանդես է գալիս հռչակավոր թիմում։ «Վաղը մենք չենք խաղա Մխիթարյանի հետ, սակայն կխաղանք հայկական հավաքականի հետ», – ասաց Գրիգորեն։ Նա ավելացրեց, որ Ռումինիայի հավաքականը երկար ժամանակ չի հաղթել և վաղը կանի հնարավորը` անմխիթար վիճակագրությունը շտկելու համար։
Ռումինացիների գլխավոր մարզիչ Քրիստոֆ Դաումն իր հերթին նշեց, որ հայկական թիմն ուժեղ է ինչպես մարտավարական, այնպես էլ ֆիզիկական տեսանկյունից, խաղը չափազանց բարդ է լինելու։ Մարզչի խոսքով` նա դիտել է դանիացիների հետ Հայաստանի հավաքականի հանդիպումը և կարծում է, որ հայկական թիմը ուներ ոչ–ոքի խաղալու բոլոր հնարավորությունները, սական չօգտագործեց իր պահը։
Պատասխանելով «Նովոստի–Արմենիա» գործակալության այն հարցին, թե արդյոք նա համարու՞մ է իր թիմին ֆավորիտ` Դաումը նշեց, որ երբեք ձեռնտու չէ լինել ֆավորիտ, և դա են վկայում Եվրո–2016 –ի հանդիպումները։ «Այդ խաղերում ֆավորիտները պարտվում էին։ Սակայն մենք կփորձենք անել հնարավոր ամեն ինչ` հաջողության հասնելու համար», – ասաց մարզիչը։
Աշխարհի 2018 թ.–ի առաջնության ընտրական փուլի շրջանակում Հայաստան–Ռումինիա հանդիպումը տեղի կունենա հոկտեմբերի 8–ին Երևանի Հանրապետական մարզադաշտում։
Հայաստանի հավաքականն առաջին հանդիպման ժամանակ արտագնա խաղում 0։1 հաշվով պարտվեց դանիացիներին և զրո միավորով զբաղեցնում է խմբի վերջին տեղը։ Դանիայի հավաքականը վաստակել է երեք միավոր։ Լեհաստանի, Ռումինիայի, Ղազախստանի և Չեռնոգորիայի հավաքականները ոչ–ոքի են խաղացել` վաստակելով մեկական միավոր։ –0–
