ԵՐԵՎԱՆ, 26 փետրվարի./Նովոստի–Արմենիա/. Ծանրամարտի աշխարհի ու Եվրոպայի նախկին չեմպիոն Նազիկ Ավդալյանը երկար ժամանակ է` դադարեցրել է մարզումները:
Այս մասին լրագրողների հետ զրույցում հայտնել է Հայաստանի ծանրամարտի ֆեդերացիայի գլխավոր քարտուղար, տղամարդկանց հավաքականի գլխավոր մարզիչ Փաշիկ Ալավերդյանը, հաղորդում է ՀԱՕԿ մամուլի ծառայությունը։
«Նա հայտարարել է, որ այլևս չի մասնակցելու մրցումների, ավարտում է կարիերան և ցանկանում է ուշադրությունը լիովին սևեռել ընտանիքի վրա»,- ասել է ֆեդերացիայի գլխավոր քարտուղարը:
Խոսելով առաջիկա ծրագրեի մասին՝ Փաշիկ Ալավերդյանը նշել է, որ մեծահասակներն օգոստոսի 20-ից հետո կարող են մասնակցել միջազգային ֆեդերացիայի օրացուցային ծրագրում ընդգրկված բոլոր մրցումներին:
Загружается новость ... "Лево"
«Մեր գլխավոր նպատակը, իհարկե, աշխարհի առաջնությունն է, որտեղ խաղարկվելու են օլիմպիական խաղերի վարկանիշեր: Նոր կանոնակարգի համաձայն, օլիմպիական ուղեգրերը լինելու են անհատական: Այսուհետ Խաղերին յուրաքանչյուր երկիր առավելագույնը կարող է ունենալ 4 կին և 4 տղամարդ ծանրորդ: Մինչև տարվա գլխավոր ստուգատեսը, մեր մարզիկները կմասնակցեն ուսանողական խաղերին, Եվրոպայի Մ 20 ու Մ 23 տարեկանների առաջնություններին, որպեսզի լիովին պատրաստ մոտենանք աշխարհի առաջնությանը: Ինչպես նաև, կունենաք ուսումնամարզական հավաքներ: Հաջորդ ամիս տղամարդիկ հավաք կանցկացնեն Ուկրաինայում, իսկ կանայք՝ Երևանի Օլիմպավանում»,- նշել է Փաշիկ Ալավերդյանը:
Այս տարի կարևոր մրցում է սպասվում պատանիներին: Բուենոս Այրեսի պատանեկան ամառային խաղերին երկիրը կարող է ներկայացնել մեկ տղա և մեկ աղջիկ.
«Մեկ ուղեգիր ունենք տղաներից: Դեռևս չենք որոշել՝ որ ծանրորդը կմեկնի Բուենոս Այրես: Ամեն դեպքում հանդես կգա ուժեղագույնը: Իսկ աղջիկներն օլիմպիական ուղեգիր կփորձեն ձեռք բերել Եվրոպայի առաջնությունում: Դրա համար պետք է թիմային հաշվարկով զբաղեցնել 1-6-րդ հորիզոնականները: Մեծ հնարավորություններ ունի Լիանա Գյուրջյանը», – նշել է ֆեդերացիայի գլխավոր քարտուղարը:
Նախատեսվում է, որ մարտի 26-ին կլինի ծանրամարտի միջազգային ֆեդերացիայի համաժողով, որին կմասնակցի նաև Փաշիկ Ալավերդյանը:–0–
