«Խոստում» ֆիլմը ստացել է համանուն առաջին մրցանակը

ԵՐԵՎԱՆ, 16 նոյեմբերի. /Նովոստի Արմենիա/. Հայոց ցեղասպանության մասին պատմող հոլիվուդյան «Խոստումը» (The Promise) ֆիլմի սաունդթրեքը մրցանակ է ստացել, հայտնում է Asbarez–ը։

Մրցանակը շնորհվել է Լոս Անջելեսի Human Rights Watch-ի կոմիտեի ամենամյա դրամահավաք-երեկոյի ընթացքում և նվիրվել է ֆիլմի երաժշտության հեղինակ Քրիս Քորնելի հիշատակին: Երեկոյի ընթացքում ֆիլմի համանուն «Խոստումը» սաունդթրեքը կատարել են One Republic հայտնի խմբի անդամներ Ռայան Թեդերը և Դրյու Բրոունը:

Ֆիլմը և երաժշտությունը միջոցառման ժամանակ ճանաչվել են հավասարության, մարդու իրավունքների և արդարության գաղափարների տարածման ինքնատիպ և ազդեցիկ աշխատանքներ:

Դրամահավաք-երեկոյին ներկա են եղել Սերժ Թանկյանը, Դևիդ Ֆորսթերը, Անժելա Սարաֆյանը, Քիմբերլի Էմերսոնը և այլ հայտնի դեմքեր։

Ամերիկացի հայտնի ռոք երգիչ Քրիս Քորնելն ինքնասպանություն էր գործել 2017-ի մայիսին՝ Դեթրոյթում կայացած համերգից անմիջապես հետո: Նրան հայտնաբերել էր թիկնապահը հյուրանոցի լոգասենյակում:

«Խոստումը» ֆիլմը մեծ էկրան է բարձրացել 2017 թ-ի ապրիլի 21-ին:

Ֆիլմի ռեժիսորն է Թերրի Ջորջը («Օսկարի» է առաջադրվել ««Ռուանդա» հյուրանոցը» ֆիլմի համար), սցենարիստը` Ռոբին Սվայկորդը: Ֆիլմում նկարահանվել են Քրիստիան Բեյլը, Ժան Ռենոն, Օսկար Այզեկը, Շարլոտ լե Բոնը, Ջեյմս Կրոմվելը, Դանիել Կաչոն, Շոհրե Ագդաշլուն, Անժելա Սարաֆյանը, Մարվին Քենզարին:

Ֆիլմի հիմքում Մայքլ անունով բժիշկ-ուսանողի, գեղեցկուհի Աննայի և Փարիզից ժամանած ամերիկացի լրագրողի միջև սիրային եռանկյունին է: Հայոց ցեղասպանության թեման շոշափող պատմական դրամայի գործողությունները տեղի են ունենում Օսմանյան կայսրության վերջին օրերին:

Հոլիվուդյան «Խոստումը» պատմական ֆիլմի ֆինանսավորումը ամերիկահայ գործարար, միլիարդատեր Քըրք Քըրքորյանի վերջին նախագիծն է: Նա մահացել է 2015-ի հունիսի 16-ին Լոս Անջելեսում: -0-