Երեք սննդամթերքներ, որոնք այրում են ճարպը

ԵՐԵՎԱՆ, 14 մարտի. /Նովոստի–Արմենիա/. Ավելորդ կիլոգրամներից ագրեսիվ մեթոդներով արագ ազատվելու փորձերը հաստատ օգուտ չեն տա և նույնիսկ կարող են վնասել օրգանիզմին, կարծում է Բրիտանիայի դիետիկ ասոցիացիայի ներկայացուցիչ Կլեր Պետիտը, գրում է vokrugsveta.ru-ն։

Քաշի նվազման և ավելարդ ճարպն այրելու գործընթացը պետք է դանդաղ և համաչափ լինի։ Միաժամանակ, սննդակարգում անհրաժեշտ է ընդգրկել ճարպն այրող սննդամթերքներ։

1. Հունական յոգուրտ



WebMD բժշկական պորտալի տվյալների համաձայն, բոլոր կաթնամթերքներից ճարպ այրող վառ արտահայտված էֆեկտ ունի հունական յոգուրտը։ Դրա արտադրությունը մի քանի փուլեր է ընդգրկում` յոգուրտը ֆիլտրում են թղթի միջոցով, ազատում են շիճուկից, ինչի շնորհիվ յոգուրտի խտությունը մոտենում է պանրի խտությանը, իսկ շաքարի և ածխաջրերի պարունակությունը պակասում է։ Այսպիսով, հունական յոգուրտում մեծ քանակությամբ սպիտակուց է մնում։ Այդ սննդամթերքը յուրացնելու համար օրգանիզմն ավելի մեծ ժամանակ է պահանջում, իսկ դա նշանակում է, որ հագեցածության զգացողությունը երկար է մնում։

2. Դարչնագույն բրինձ



Հատիկավորներից ամենաօգտակարը սլացիկ մարմին ունենալու համար դարչնագույն բրինձն է։ Բուսական մանրաթելերի բարձր պարունակության շնորհիվ այն ավելի երկար է մարսվում, ինչն օգնում է օրգանիզմին ավելի շատ էներգիա ծախսել և թույլ է տալիս մարդուն ավելի երկար ժամանակ քաղցի զգացողություն չունենալ։

Բջջանյութով հարուստ նմանատիպ սննդամթերքի թվին են պատկանում նաև ամբողջահատիկի հացը, ընդեղենը, կարծր տեսակների հացահատիկից պատրաստած մակարոնեղենը։

3. Չիլի պղպեղ



Չիլի պղպեղը ոչ միայն կարող է համեմունքների փոխարինող դառնալ սուր կերակրատեսակներ նախընտրողների համար, այլ նաև կօգնի ազատվել ավելորդ կիլոգրամներից։ ԱՄՆ Վայոմինգի համալսարանի գիտնականների ուսումնասիրության համաձայն, չիլի պղպեղում պարունակվող կապսաիցին ալկալոիդի շնորհիվ, պղպեղի այս տեսակն արագացնում է նյութափոխանակությունը և օգնում օրգանիզմին վնասակար սպիտակ ճարպը վերածել դարչնագույնի։

Առաջինն օրգանիզմում էներգիայի կուտակման համար է, իսկ երկրորդն այն ծախսում է։

Եվ վերջում, իհարկե, պետք է հիշել, որ ավելորդ կիլոգրամներին հրաժեշտ տալու հարցում անփոխարինելի է մաքուր ջրի դերը։ Ավելի առողջ և բարեկազմ լինելու համար օրը սկսեք մեկ բաժակ մաքուր ջրից և ավելացրեք դրա ծավալը ողջ օրվա ընթացքում։



Ջրի հիանալի այլընտրանք կարող է լինել ձմերուկը, որն 92 տոկոսով բաղկացած է ջրից, ինչպես նաև պարունակում է А և С վիտամիններ։ -0-