ԵՐԵՎԱՆ, 22 դեկտեմբերի. /Նովոստի–Արմենիա/. Հայտնի երգչուհի Սելենա Գոմեսը երկուշաբթի իր երկրպագուների դատին է հանձնել «Hands to Myself» նոր տեսահոլովակը։
Ինչպես նշել է երգչուհին Twitter–ի իր էջում, տեսահոլովակի ռեժիսորը հայազգի Ալեք Քեշիշյանն է։
Լիբանանահայ ռեժիսոր Ալեք Քեշիշյանն աշխատում է հոլիվուդյան բազմաթիվ աստղերի հետ։ Նա հիմնականում նկարահանում է տեսահոլովակներ և գովազդային հոլովակներ։
Ալեք Քեշիշյանը հայտնի է նրանով, որ 1991 թ.–ին նկարահանել է աշխարհահռչակ երգչուհի Մադոննայի մասին պատմող «Մադոննա. իրականություն, թե խիզախություն» (Madonna: Truth or Dare) վավերագրական ֆիլմը, որն այդ ժամանակվա ամենամեծ եկամուտներ գրանցած վավերագրական ֆիլմն է։
Իր կարիերայի ընթացքում Քեշիշյանն աշխատել է այնպիսի աստղերի հետ, ինչպիսիք են Մադոննան, Բոբի Բրաունը, Էլթոն Ջոնը, Դարեն Հեյսը։ Նա գովազդային հոլովակներ է նկարահանել Coca Cola, Peugeot, Volkswagen, Brut by Faberge, Aprilia, Bailey’s և Max Factor ընկերությունների համար։ –0–