Այսօրվա դրությամբ ռուսական իշխանությունները լեգիտիմության ճգնաժամ են ապրում, սակայն երկրում հեղափոխություն չի լինի, կարծում է Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
«Ռուսաստանում տասը տարվա ընթացքում նման մեծաթիվ հանրահավաքներ չեն եղել: Եթե մայրաքաղաքներով դատենք, ապա սա ռեժիմի լուրջ ապալեգիտիմացում է: Դա բոլորովին չի նշանակում, որ հեղափոխություն է լինելու կամ որ ընտրությունները չեղյալ են համարվելու, բայց ուժեղ լեգիտիմությամբ ավտորիտար առաջնորդն ու թույլ լեգիտիմությամբ ավտորիտար առաջնորդը շատ տարբեր բաներ են: Իսկ Ռուսաստանում լեգիտիմության ռեժիմը չափազանց ցածր է»,- ասաց նա:
Ըստ Իսկանդարյանի, 1999թ.-ի հետո այնպիսի տպավորություն էր, որ Ռուսաստանում իրոք ինչ-որ լուռ հասարակական պայմանագիր է գործում, և մարդկանց մեծ մասը պատրաստ էին հանուն ինչ-որ նյութական շահերի զոհաբերել իրենց քաղաքական ազատությունների մի մասը:
«Իհարկե, միշտ եղել են նրանք, ովքեր դեմ են եղել դրան, սակայն նրանք բավական մարգինալ մարդիկ էին, մտավորականությունը, այլախոհները, քաղաքական ընդդիմությունը: Այժմ ինձ մոտ տպավորություն է ստեղծվում, որ հասարակական պայմանագիրը, եթե չի վերացել, ապա չափազանց խախտվել է»,- նշեց քաղաքագետը: -0-
