Փաշինյանը` Բոլթոնի այցի մասին. կոչ եմ անում չվերագրել կառավարությանը հայտարարություններ, որոնք նա չի արել

ԵՐԵՎԱՆ, 1 նոյեմբերի. /Նովոստի-Արմենիա/. ԱՄՆ նախագահի` ազգային անվտանգության հարցերով խորհրդական Ջոն Բոլթոնի այցը դիվանագիտական մեծ նվաճում է, ասել է Հայաստանի վարչապետի պաշտոնակատար Նիկոլ Փաշինյանը հինգշաբթի խորհրդարանի արտահերթ նիստում:

«Բոլթոնի այցի հետ կապված կարևոր բան կատարվեց` Ռուսաստանի ներկայացուցիչները հիշեցրեցին ԱՄՆ-ին, որ Հայաստանն ինքնիշխան պետություն է, ԱՄՆ-ի ներկայացուցիչները հիշեցրեցին Ռուսաստանին, որ Հայաստանն անկախ երկիր է: Չեմ կարծում, թե որևէ մեկը մոռացել էր դրա մասին, որովհետև մենք մեր ամբողջ գործունեությունը կառուցում ենք այդ դիրքից»,- ասել է նա:


Փաշինյանը հայտարարել է, որ Բոլթոնի հետ իր հանդիպման ժամանակ չի եղել ոչ մի, նույնիսկ ամենաանշան դրվագ, որը պետք է անհանգստացնի Հայաստանն ու հայ ժողովրդին:

Իսկ ինչ վերաբերում է ԱՄՆ-ի և Իրանի միջև փոխհարաբերություններին, ապա, նրա խոսքով, Հայաստանը հարգանքով է վերաբերվում յուրաքանչյուր երկրի հայտարարություններին և նրանց պետական շահերին, բայց ունի սեփական պետական և ազգային շահերը, որոնք կարող են չհամընկնել այլ երկրների հետ:

«Մենք կառուցում ենք հարաբերություններ` հիմնվելով ազգային շահերի վրա բոլոր երկրների` ԱՄՆ-ի, Իրանի, Ռուսաստանի հետ, այդ իսկ պատճառով կոչ եմ անում չվերագրել կառավարությանը հայտարարություններ, որոնք նա չի արել: Ելնելով աշխարհաքաղաքական դրությունից` մենք կունենանք լավ հարաբերություններ Վրաստանի և Իրանի հետ: Այդ մասին ես ասել եմ Բոլթոնին, և մեր դիրքորոշումը նրան հասկանալի և ընդունելի էր»,- ասել է Փաշինյանը: -0-