Մենք կարող ենք ինքներս լուծել և՛ Ղարաբաղում, և՛ Մերձդնեստրում, և՛ Ուկրաինայում առկա խնդիրները. Լուկաշենկո

ԵՐԵՎԱՆ, 15 հունիսի. /Նովոստի-Արմենիա/. Հավաքական անվտանգության պայմանագրի կազմակերպության տարածաշրջանի խնդիրներն անհրաժեշտ է ինքնուրույն լուծել, առանց օտար քաղխորհուրդների միջամտության: Ինչպես հաղորդում է belta.by-ն, այդ մասին հայտարարել է Բելառուսի նախագահ Ալեքսանդր Լուկաշենկոն հինգշաբթի ՀԱՊԿ անդամ պետությունների անվտանգության խորհուրդների քարտուղարների հետ հանդիպմանը:

«Շատ կցանկանայի, որ մեր խնդիրներն ինքներս լուծեինք: Սեղանի շուրջ՝ Մինսկում, Մոսկվայում, Երևանում, ՀԱՊԿ այլ երկրների քաղաքներում: Որպեսզի չլինի որևէ այլ պետությունների, խմբերի, կլոր սեղանների ազդեցությունը: Առավել ևս, որ մենք կարող ենք լուծել այդ խնդիրները և՛ Ղարաբաղում, և՛ Մերձդնեստրում, և՛ Ուկրաինայում: Դրանք մեր խնդիրներն են: Մենք դրանք պետք է լուծենք՝ առանց օտար քաղխորհուրդների և միջամտությունների»,- ընդգծել է Բելառուսի նախագահը:

Նա նշել է, որ եթե հաջողվեր հանգուցալուծել ՀԱՊԿ տարածքում,առկա անհանգստացնող իրավիճակները և անկայունության օջախները, ապա կազմակերպության հեղինակությունը զգալի կաճեր:

«Անկասկած, միայն համատեղ ջանքերով մենք կկարողանանք ապահովել մեր ազգային շահերի պաշտպանությունը»,- ընդգծել է Բելառուսի նախագահը:


Նրա խոսքով՝ այդ առումով շատ բան է կախված անվտանգության խորհուրդների քարտուղարներից, ինչը պայմանավորված է նրանց հատուկ լիազորություններով և պետությունների ղեկավարներին անմիջական ենթակայությամբ:

«Դուք ունեք առկա խնդիրներին համապարփակ, բազմակողմանի մոտենալու բացառիկ հնարավորություն` արտացոլելով արդի մարտահրավերները, մշակել նոր գաղափարներ ու նախաձեռնություններ, ձեռք բերված պայմանավորվածությունները նպատակաուղղված վերածել իրական միջոցառումների», - ասել է Ալեքսանդր Լուկաշենկոն: -0-