Հայաստանում ռուսական ռազմակայանի զինծառայողները ծառայության հաստատված ժամկետը լրանալուց հետո, ըստ ժամանակացույցի, ավիաչվերթերով կմեկնեն Ռուսաստան, հեռախոսազրույցի ժամանակ «Նովոստի-Արմենիա» գործակալությանն է ասել Հարավային ռազմական օկրուգի զորահրամանատարի մամուլի քարտուղար, գնդապետ Իգոր Գորբուլը:
Երեքշաբթի ռուսական ԶԼՄ-ները տեղեկատվություն են տարածել, որ պահեստային զինվորականները չեն կարողանում տուն վերադառնել տրանսպորտի բացակայության պատճառով:
«Այսօր ավելի քան 150 մարդու մեկնում է նախատեսված»,- տեղեկացրել է Գորբուլը:
Ըստ նրա, զինծառայողների համար զինվորական փոխադրման փաստաթղթեր են պատրաստվել, որոնց օգնությամբ նրանք կարող են անվճար տուն հասնել նաև Ռոստովից:
«Ես ևս մեկ անգամ կրկնում եմ, որ դա պլան-ժամանակացույց է: Դրա համաձայն, ծրագրված է ևս ավելի քան 50 հոգու մեկնում»,- նշել է նա:
«Ցանկանում եմ նշել, որ մեկնելու սպասող բոլոր զինծառայողները գտնվում են մշտական տեղակայման կետերում, այսինքն՝ զորանոցներում, և ապահովված են անհրաժեշտ ամեն ինչով»,- ավելացրել է Գորբուլը:
Հայաստանի հյուսիսում գտնվող Գյումրի քաղաքում 1995 թ.-ից տեղակայված է ռուսական 102-րդ ռազմաբազան, որը մարտական հերթապահություն է իրականացնում ԱՊՀ հակաօդային պաշտպանության միասնական համակարգի շրջանակներում:
2010թ.-ի օգոստոսի 20-ին ՌԴ-ն և Հայաստանը երկարաձգել են ռազմակայանի պայմանագրի գործողությունների ժամկետը: Պայմանագիրը ստորագրվել է 1995թ.-ին, դրա գործողության ժամկետը կազմում է 25 տարի, այժմ փաստաթուղթը գործելու է մինչև 2044թ.-ը: -0-
