ՀԱՊԿ ԱԳՆ ղեկավարները կքննարկեն արագ արձագանքման հավաքական ուժերի նորմատիվ ձևակերպումը

ԵՐԵՎԱՆ, 11 հունիսի. /Նովոստի-Արմենիա/. ՀԱՊԿ ԱԳՆ ղեկավարները հունիսի 14-ին Մոսվայում հանդիպման ժամանակ կքննարկեն ՀԱՊԿ արագ արձագանքման հավաքական ուժերի նորմատիվ ձևակերպումը, ասվում է ՌԴ ԱԳՆ-ի  հաղորդագրության մեջ։

Հավաքական անվտանգության պաշտպանության կազմակերպության արտգործնախարարների խորհրդի հերթական նիստը կկայանա հունիսի 14-ին Մոսվայում։

«Նախարարներն առաջարկություններ կպատրաստեն երկրի ղեկավարների մակարդակով անցկացվող կազմակերպության հավաքական անվտանգության խորհրդի առաջիկա նիստի օրակարգի առնչությամբ, որի կենտրոնական հարցը ՀԱՊԿ օպերատիվ արձագանքման հավաքական ուժերի ստեղծման նորմատիվ ձևակերպումը կլինի»,- ասվում է հինգշաբթի ՌԴ ԱԳՆ կայքի հրապարակած հաղորդագրության մեջ։ 

Հանդիպման ժամանակ կդիտարկվեն նաև նախագահների կողմից ստորագրման նախապատրաստվող մի շարք այլ փաստաթղթեր, մասնավորապես Հավաքական անվտանգության խորհրդի նիստի ամփոփիչ հայտարարությունը և ՀԱՊԿ գործունեության առաջնահերթային ուղղությունները 2009թ.-ի երկրորդ կիսամյակում ու 2010թ.-ի առաջին կիսամյակում, հայտնեցին նախարարությունից։  

ԱԳՆ ղեկավարները կդիտարկեն արտաքին քաղաքական գործողությունների համակարգման, այլ միջազգային կառույցների հետ ՀԱՊԿ փոխգործակցության զարգացման, Կազմակերպության անդամ-պետությունների անվտանգության մարտահրավերներին ու սպառնալիքներին հակազդելու մեխանիզմների կատարելագործման հարցեր։

«Նախարարական հանդիպման օրակարգում ընդգրկված են նաև մի շարք կազմակերպչական ու ֆինանսաբյուջետային հարցեր, որոնց հետ կապված որոշումները կընդունեն պետությունների ղեկավարները։ Կհամաձայնեցվեն Կազմակերպության ԱԳՆԽ հաջորդ նստաշրջանի անցկացման օրն ու վայրը»,- ասվում է հաղորդագրության մեջ։ --0--