«Մասնավոր պահնորդական գործունեության մասին» օրինագիծը Հայաստանում հստակ կսահմանի թիկնապահների իրավունքներն ու պարտավորությունները

«Մասնավոր պահնորդական գործունեության մասին» օրինագիծը, որը երեքշաբթի ընդունվեց Հայաստանի Ազգային ժողովում, թույլ կտա հստակ տարբերակել թիկնապահների իրավունքներն ու պարտավորությունները, ասաց Ազգային ժողովի ՀՀԿ պատգամավոր Հովհաննես Սահակյանը:

Հայաստանի Ազգային ժողովը երեքշաբթի առաջին ընթերցմամբ ընդունեց «Մասնավոր պահնորդական գործունեության մասին» օրինագիծը և հարակից օրենքների մի շարք լրացումներ, որոնք նախատեսում են մասնավոր պահնորդական գործունեության և թիկնապահների ծառայությունների ոլորտի օրենսդրական կարգավորում:
Օրինագծի համաձայն, պահպանվող անձին չի կարող ուղեկցել մեկից ավելի տրանսպորտային միջոց և երեքից ավելի թիկնապահ: Պետական գերատեսչությունների և տեղական ինքնակառավարման մարմինների պաշտոնատար անձինք չեն կարող օգտվել թիկնապահների ծառայություններ տրամադրող մասնավոր ձեռնարկությունների ծառայություններից:

«Ցանկանում եմ նշել, որ, մասնավորապես, պահնորդական գործունեության մեջ անհրաժեշտ է հստակ սահմանազատել թիկնապահների իրավունքներն ու պարտավորթյունները, ինչը հետագայում կարող է կարգավորել այդ դաշտը»,- երեքշաբթի հրավիրված ասուլիսի ժամանակ ասաց Սահակյանը:

Ըստ նրա, օրինագծի կետերի ցանկացած խախտում պատժամիջոցներ է նախատեսում տուգանքների տեսքով՝ նվազագույն աշխատավարձի մինչև 200-ակի չափով:

Սահակյանն առավել կարևոր է համարում այն, որ պահնորդական ձեռնարկությունները կզրկվեն որևէ այլ գործունեությամբ զբաղվելու իրավունքից, և հատուկ հավաստագիր կստանան հատուկ դասընթացներ անցնելուց հետո:
Բացի այդ, զենքի կիրառման բոլոր դեպքերում թիկնապահը պետք է տեղեկացնի այդ մասին գործատու ընկերությանը և իրավապահ մարմիններին: Ինչ վերաբերում է նախկինում դատվածություն ունեցող թիկնապահներին, պատգամավորի կարծիքով, սխալ կլիներ հասարակությունից մեկուսացնել այն մարդկանց, ում դատվածություններն արդեն մարվել են:
Նա, մասնավորապես, նշեց անզգուշությամբ կամ թեթև հանցագործությունների համար պատիժ կրած անձանց:
Սահակյանն ընդգծեց, որ օրինագիծն այնքան լայն հասարակական արձագանք ստացավ, որ դրա խախտման դեպքերը կարող են նվազագույնի հասցվել: Օրինագիծը պատրաստվել է ընդդիմադիր ՀՅԴ խմբակցության և Հայաստանի Հանրապետական կուսակցության կողմից կառավարության համագործակցությամբ: -0-