Հայաստանում Մանկական Եվրատեսիլի հաղթողին լեռների տեսքով արձանիկ կհանձնվի

«Մանկական Եվրատեսիլ 2011» միջազգային երգի մրցույթի հաղթողը որպես մրցանակ կստանա արձանիկ հայկական լեռների տեսքով՝ փայտից և արծաթից, ասաց մրցույթում հայկական պատվիրակության ղեկավար Գոհար Գասպարյանը:

Մրցույթը կանցկացվի դեկտեմբերի 3-ին Երևանում:

«Մրցանակը խորհրդանշում է մեր լեռները: Դրա հեղինակը հայ հայտնի դիզայներ Նուռն է»,- չորեքշաբթի մամուլի ասուլիսում ասաց Գասպարյանը:
 
Նա միաժամանակ նշեց, որ հայկական կողմն ունի հաղթելու բոլոր հնարավորությունները: «Մենք հիանալի շոու և հրաշալի երգչուհի ունենք: Ամեն ինչ պատրաստ է, ունենք ամեն ինչ հաղթանակի համար»,- ընդգծեց Գասպարյանը:
 
Նա հայտնեց, որ դեկտեմբերի 2-ին կանցկացվեն երկու գլխավոր փորձերը, ընդ որում, երկրորդն ամենաիսկական համերգ կլինի, քանի որ կանցնի հանդիսատեսի ներկայությամբ:
 
«Եվրատեսիլ» միջազգային երգի մրցույթի ղեկավար Սիեսթե Բեյքերը հայտնեց, որ այս տարի մրցույթի քվեարկության կանոններում որոշակի փոփոխություններ կկատարվեն:
 
Մասնավորապես, նրա խոսքով, եթե նախկինում քվեարկությունը սկսվում էր արդեն իսկ առաջին երգի կատարումից հետո, ապա այս տարի հանդիսատեսը կկարողանա քվեարկել միայն բոլոր ելույթներից հետո, ընդ որում՝ քվեարկությունը կտևի 15 րոպե:

«Մանկական Եվրատեսիլ 2011»-ին Հայաստանը կներկայացնի երգչուհի Դալիթան Welcome to Armenia երգով:

Բացի Հայաստանից, մրցույթին մասնակցում են պատանի կատարողներ և կոլեկտիվներ ևս 12 երկրներից: -0-