Հայաստանի պաշտպանության նախարարությունը հերքում է ոչ պիտանի սպառազինության գնումների մասին լուրերը

Հայաստանի պաշտպանության նախարարի մամուլի քարտուղար Դավիթ Կարապետյանը հինգշաբթի հերքել է ԶԼՄ-ներում տարածված լուրերն այն մասին, թե իբր Հայաստանը Մոլդովայից գնել է ոչ պիտանի ռազմական տեխնիկա:

Օրերս մի շարք ԶԼՄ-ներ հայտնել են, որ Հայաստանը Մոլդովայից իբր ոչ պիտանի ռազմատեխնիկա է գնել:

«Ելնելով ազգային անվտանգության շահերից` սպառազինության գնումների քանակի, տեսականու և վաճառող կողմի վերաբերյալ մանրամասները հրապարակման ենթակա չեն: Կարող եմ միայն նշել, որ Հայաստանի Հանրապետությունը անկախությունից ի վեր ոչ պիտանի սպառազինություն երբեք չի գնել»,- Կարապետյանի խոսքն է մեջբերում պաշտպանական գերատեսչության մամուլի ծառայությունը:

Նա նշել է նաև, որ Հայաստանի զինված ուժերի կարիքների համար սպառազինության և ռազմական տեխնիկայի ձեռքբերումներն ու գնումները իրականացվում են ՀՀ օրենսդրության և միջազգային համապատասխան նորմերի ու պարտավորությունների շրջանակներում:

Ավելի վաղ մոլդովական ԶԼՄ-ները հաղորդել էին Հայաստանին զինամթերքի մատակարարումների մասին: Մոլդովայի պաշտպանության նախարար Վիտալի Մարինուցայի խոսքով՝ երկրի ղեկավարությունն իրազեկվել է սպառազինության վաճառքի մասին, պահպանվել են ինչպես Մոլդովայի օրենսդրությունը, այնպես էլ միջազգային կոնվենցիաները:

Կովկասի ինստիտուտի քաղաքական ուսումնասիրությունների բաժնի ղեկավար Սերգեյ Մինասյանի կարծիքով՝ Հայաստանը Մոլդովայից ժամանակակից հրթիռային սպառազինություն է գնել:

«Բացի զուտ ռամզական բաղադրիչից, բավականին հետաքրքիր ու հատկանշական  ցուցանիշ է այն, որ ՎՈՒԱՄ-ի կազմում ընդգրկված և այդ կառույցին ակտիվ մասնակցող երկիրը սպառազինություն է վաճառում, որը ղարաբաղյան հակամարտության գոտում ռազմական գործողությունների հիպոտեթիկ մեկնարկի դեպքում կօգտագործվի Ադրբեջանի դեմ»,- ասաց նա «Նովոստի-Արմենիա» գործակալությանը տված հարցազրույցում:--0--