ՀՀ ոստիկանապետ Ալիկ Սարգսյանը չի բացառում այն բանի հավանականությունը, որ Երևանում գործող ավազակային խմբում կարող են մասնակցել համակարգի նախկին աշխատակիցներ:
2011թ. Երևանի Մալաթիա-Սեբաստիա և Ավան, Նոր Նորք վարչական շրջաններում 5 ավազակային հարձակում է տեղի ունեցել: Քրեական գործերը քննվում են տարբեր քննիչների վարույթում, թեև կատարված հանցագործության ձեռագրերի նմանությունն ակնհայտ է: Հաշվի առնելով ստացված ապացույցները՝ Հայաստանի գլխավոր դատախազը հրահանգել է հինգ քրեական գործերը միավորել մեկ վարույթում և վերաորակավորել դրանք «ավազակություն» հոդվածով:
«Մենք դա չենք բացառում, քանի որ հանցագործությունների կատարման ժամանակ դրսևորած հմտությունները հիմք են տալիս ենթադրելու, որ նրանք նախկինում ներառված են եղել հատուկ ջոկատների, խմբավորումների, ինչու ոչ` նաև մեր համակարգի կամ այլ համակարգերի կազմում, եղել են այն մարդկանցից, ովքեր այցելել են հանցագործությունների վայրեր, տեսել հանցագործների ձեռագիրը», - ասաց Սարգսյանը հինգշաբի Երևանում կառավարության նիստից հետո տեղի ունեցած հանդիպման ժամանակ:
Նա հավելեց, որ հանցագործները գործում են շատ հմուտ կերպով, փորձում են բացառել ամեն մի սխալ:
Ոստիկանապետը տեղեկացրեց, որ նախօրեին իր կարգադրությամբ օպերատիվ քննչական խումբ է ստեղծվել, որում ներառվել են համակարգի լավագույն աշխատակիցները, ովքեր համապատասխան փորձ ունեն:
«Ցանկանում եմ հավաստիացնել, որ մենք կանենք հնարավոր ամեն ինչ՝ սեղմ ժամկետներում հանցագործությունները բացահայտելու համար, քանի որ այս ամենը հղի է շատ ավելի վատ և բարդ հետևանքներով», - ասաց նա՝ ավելացնելով, որ ոստիկանությունն ունի որոշակի տվյալներ և տեղեկատվություն, որոնք լուրջ, հետևողական մշակման կարիք ունեն:
Հարձակումները կատարվել են վաղ առավոտյան՝ ժամը 04:30-06:00-ի սահմաններում: Հանցագործների թիվը եղել է 4-5, սև հագուստներով, սև դիմակներով և ձեռնոցներով, զինված հրազենով, ովքեր ընդհուպ բռնության գործադրմամբ հափշտակել են առանձնապես խոշոր չափերի գումար:-0-
