ԵՐԵՎԱՆ, 14 հուլիսի. /Նովոստի-Արմենիա/. Երևանում նախատեսվում է մայրաքաղաքի կենտրոնական մասում մերձքաղաքային տրանսպորտային միջոցների կայանման արգելք մտցնել, չորեքշաբթի «Նովոստի-Արմենիա» գործակալությանը տեղեկացրել են Երևանի քաղաքապետարանի մամուլի ծառայությունից:
Մամուլի հաղորդագրության համաձայն՝ Երևան քաղաքի տրանսպորտի զարգացման հայեցակարգի շրջանակներում Երևանի քաղաքապետարանը, ՀՀ տրանսպորտի և կապի նախարարության և ճանապարհային ոստիկանության հետ համատեղ, մշակել է մայրաքաղաքի կենտրոնը տրանսպորտային միջոցներից բեռնաթափելու անհրաժեշտ միջոցառումների ծրագիր, որի բաղադրիչներից մեկը մայրաքաղաքի կենտրոնական հատվածներում մերձքաղաքային ուղևորատար տրանսպորտային միջոցների կայանումն արգելելն է:
Ծրագրի այս մասով նախատեսվում է, որ Երևան քաղաք մուտք գործող մերձքաղաքային երթուղիներն իրենց վերջնականգառը հիմնականում պետք է կատարեն Երևան քաղաքի ավտոկայաններում կամ քաղաքապետարանի կողմից նախատեսված համապատասխան երթակարգավարական կետերում։
Ըստ այդմ, Երևանի քաղաքապետարանն առաջարկում է, որ Արագածոտնի մարզի կողմից Երևան եկող ուղևորատար տրանսպորտային միջոցները, որոնք շարժվում էին Կիևյան, Բաղրամյան, Պարոնյան, Պռոշյան փողոցներով, այսուհետ կայանեն ոչ թե Պարոնյան փողոցում, այլ Լենինգրադյան փողոցից Ծիծեռնակաբերդի և Աթենքի խճուղով մուտք կգործեն Կենտրոնական ավտոկայան։
Նմանատիպ կերպով կփոխվեն նաև այլ մարզերից Երևան մուտք գործող տրանսպորտային միջոցների երթուղիները:
Երևանի քաղաքապետարանը վստահեցնում է, որ նշված փոփոխությունները որևէ կերպ չեն խոչընդոտի բնակչության պատշաճ սպասարկմանը։ «Նշված բոլոր վերջնականգառներից դեպի մայրաքաղաքի կենտրոն և հակառակ ուղղությամբ գործում են ներքաղաքային համապատասխան երթուղիներ։ Անհրաժեշտության դեպքում այդ երթուղիների թիվը կավելացվի», - նշվում է տեղեկատվության մեջ:-0-
