Հայաստանում անհրաժեշտ է ազգային բանակի հեղինակության բարձրացմանն ուղղված միջոցառումներ ձեռնարկել. Մարդու իրավունքների պաշտպան

ԵՐԵՎԱՆ, 28 հոկտեմբերի. /Նովոստի-Արմենիա/. Հայաստանում անհրաժեշտ է ազգային բանակի հեղինակության և նրա նկատմամբ վստահության բարձրացմանն ուղղված միջոցներ ձեռնարկել, հինգշաբթի լրագրողներին տեղեկացրեց ՀՀ մարդու իրավունքների պաշտպան Արմեն Հարությունյանը՝ ներկայացնելով Զինված ուժերում իրավիճակի ուսումնասիրության արդյունքները:

«Մենք այս ուսումնասիրությունը սկսել ենք «Հանդուրժողականության կենտրոն» հասարակական կազմակերպության հետ համատեղ և ԵԱՀԿ-ի աջակցությամբ: Հարկավոր է նշել, որ մեր ներկայացուցիչներն աշխատանքի ընթացքում տեղեկատվության ստացման հետ կապված խոչընդոտների չեն բախվել, ինչը նշանակում է, որ մեր բանակում թափանցիկությունը զգալիորեն ավելացել է», - նշեց Մարդու իրավունքների պաշտպանը:

Նա տեղեկացրեց, որ ուսումնասիրությունն իրականացվել է Հայաստանի տարբեր մարզերում գտնվող յոթ զորամասերում անցկացված անանուն հարցման հիման վրա:

«Մենք առաջարկում ենք բանակի հեղինակության բարձրացմանն ուղղված ավելի արդյունավետ քայլեր ձեռնարկել, քանի որ նշանաբաններն ու սոցիալական գովազդն արդեն այնքան էլ արդյունավետ չեն», - ասաց Մարդու իրավունքների պաշտպանը:

Արմեն Հարությունյանի խոսքերով՝ ուսումնասիրության մեջ կարևոր տեղ են զբաղեցնում բանակում հոգեբանական կողմը, կրթական տարրը:

Նա նշեց, որ ուսումնասիրության արդյունքում մի շարք առաջարկներ են մշակվել:

«Անհրաժեշտ է ինչպես զինվորների, այնպես էլ սպայական կազմի շրջանում ծառայության նկատմամբ մոտիվացիայի բարձրացմանն ուղղված միջոցառումներ անցկացնել: Հարկավոր է նաև ավելի լուրջ մոտեցում դրսևորել ԶՈւ-ի համակարգում աշխատելու համար կադրերի ընտրության նկատմամբ», - ասաց Մարդու իրավունքների պաշտպանը:

Նա ընդգծեց, որ չափազանց կարևոր է Զինված ուժերի համակարգում մանկավարժական կադրերի առկայությունը, ինչպես նաև իրավաբանական անկյունների ստեղծումը, որտեղ սպաներն ու զինվորները կարող են ծանոթանալ իրենց իրավունքների հետ:-0-