Արդյունավետ համագործակցությունը պետք է կառուցվի ԼՂՀ և Ադրբեջանի օմբուդսմենների միջև, կարծում է ՀՀ մարդու իրավունքների պաշտպան Արմեն Հարությունյանը։
«Վերջերս ես համագործակցության կոչով դիմել եմ ԼՂՀ և Ադրբեջանի օմբուդսմեններին։ Իրավունքների պաշտպանի ինստիտուտը քաղաքական չէ...Մենք չենք կարող սպասել, քանի դեռ քաղաքական գործիչները համաձայնության կգան, անհրաժեշտ է կապեր հաստատել և լուծել առկա խնդիրները»,- հինգշաբթի ԱԺ պրոֆիլային հանձնաժողովներում 2011թ.-ի հանրապետության պետբյուջեի նախագծի քննարկման ժամանակ ասաց Հարությունյանը։
ՀՀ օմբուդսմեն Արմեն Հարությունյանը հոկտեմբերի 20-ին կոչ է արել Լեռնային Ղարաբաղի հանրապետության և Ադրբեջանի իր գործընկերներին հանդուրժողականություն ցուցաբերել և հայ-ադրբեջանական սահմանին զոհվածների դիակները վերադարձնելու վերաբերյալ միջոցներ ձեռնարկել։ ՀՀ մարդու իրավունքների պաշտպանը կոչ է արել Ադրբեջանի օմբուդսմեն Էլմիրա Սուլեյմանովային մարդասիրություն ցուցաբերել և պատկան կառույցներից պահանջել, որ նրանք թույլ տան միջազգային փորձագետներին ուսումնասիրել ՀՀ քաղաքացի Մանվել Սարիբեկյանի գերության հանգամանքներն ու մահվան պատճառները:
Որպես օրինակ Մարդու պաշտպանը նշել է Մոլդովայի և Մերձդնեստրի օմբուդսմենների համագործակցությունը։
Հարությունյանը տեղեկացրեց, որ ԼՂՀ-ի իր գործընկերների հետ մշտական կապի մեջ է գտնվում, և հայկական կողմն ուժերի չափով ԼՂՀ օմբուդսմենին տարբեր միջազգային համաժողովների է հրավիրում։
«Այնտեղ, որտեղ կազմակերպիչները մենք ենք, դա հեշտ է իրականացնել, բայց եթե համաժողովի կազմակերպիչը մեկ այլ երկիր կամ միջազգային կազմակերպություն է , ապա իրավիճակը բարդանում է»,- ավելացրեց նա։
Ըստ Պաշտպանի, վերջերս ԼՂՀ օմբուդսմենը Եվրոպական օմբուդսմենների ասոցիացիայի անդամ է դարձել, ինչպես նաև բանակցություններ են տարվում միջազգային կառույցներում Ղարաբաղի մարդու իրավունքների պաշտպանի մասնակցության ընդլայնման վերաբերյալ։ Ինչպես նշեց նա, եվրոպական կազմակերպությանն անդամակցելու շնորհիվ, ԼՂՀ օմբուդսմենը բազմաթիվ Մարդու իրավունքների պաշտպանների հետ է համագործակցում, օրինակ, Եկանտերինբուրգի օմբուդսմենի հետ կապերի շնորհիվ հաջողվել է վերամիավորել ամուսնուն և կնոջը, ովքեր կորցրել էին միմյանց։
«Այսօր միջազգայնորեն ճանաչված երկրների օմբուդսմենները չեն խուսափում ԼՂՀ մարդու իրավունքների պաշտպանի հետ համագործակցելուց։ ԼՂՀ օմբուդսմենի ինստիտուտը կայացել է և միջազգային հանրության կողմից ավելի մեծ ճանաչում է ստանում»,- հայտնեց Հարությունյանը։ -0-
