Հայաստանի ժուռնալիստների միությունը հայ լրագրողներին «Ազդարար» մրցանակն է շնորհել

ԵՐԵՎԱՆ, 20 հոկտեմբերի. /Նովոստի-Արմենիա/.  Հայաստանի ժուռնալիստների միությունը չորեքշաբթի հայ լրագրողներին է շնորհել ամենամյա «Ազդարար» մրցանակը։

2004թ.-ին ՀՀ կառավարությունը հոկտեմբերի 16-ը Հայկական մամուլի օր է հայտարարել, և մինչ օրս ամեն տարի Հայաստանի ժուռնալիստների միությունը հայկական լրագրության զարգացման մեջ ունեցած ներդրման համար «Ազդարար» մրցանակ է շնորհում։

«Տպագիր ԶԼՄ-ներ» անվանակարգում «Ազդարար» մրցանակի արժանացավ «Կանչ» թերթի խմբագրությունը, որի 86 տարին կլրանա հոկտեմբերի 26-ին։ Ժյուրին նշեց, որ բոլոր հայտնի լրագրողներն իրենց ստեղծագործական ուղին այս թերթից են սկսել։

«Հեռուստալրագրող» անվանակարգում մրցանակ ստացավ «Երկիր Մեդիա» հեռուստաընկերության «Այսօր» ծրագիրը՝ Հայաստանի պատմությունն անաչառ ներկայացնելու  համար։

«Ռադիոեթեր» անվանակարգում մրցանակ շնորհվեց «Վան» ռադիոկայանին՝ որպես համեմատաբար երիտասարդ, բայց ռադիոեթերում արագ դրսևորված ռադիոկայանի։

«Մարզային լրատվամիջոցներ» անվանակարգում մրցանակ շնորհվեց «Արարատ» մարզային թերթի գլխավոր խմբագիր Նելլի Բեգլարյանին՝ մարզային  մամուլում երկար տարիների նվիրված աշխատանքի համար։

«Սփյուռքահայ մամուլ» անվանակարգում մրցանակ շնորհվեց Կալինինգրադի «Նաիրի» թերթին, որը լուսաբանում է Հայաստանում առկա իրավիճակները ոչ միայն հայերեն, այլ նաև օտար լեզուներով։

Լուսանկարիչներից մրցանակ ստացավ ծագումով հայ կանադացի լուսանկարիչ Հրայր Բազեն՝ համաշխարհային հանրությանն Արևմտյան Հայաստանի մասին լուսանկարչական նյութեր տրամադրելու համար։

Ինչպես նշեց ժյուրիի նախագահ Ջուլիետա Մարտիրոսյանը, թեկնածուների ընտրության ժամանակ հիմնական չափորոշիչները վերջին տարվա ընթացքում նրանց գործունեության ուսումնասիրությունն ու հասարակության շրջանում ունեցած վարկանիշն է եղել։  -0-