Մայր Աթոռ Սուրբ Էջմիածնում մեկնարկել է հայկական տպագրության հիմնադրման 500-ամյա հոբելյանին նվիրված գիտաժողովը
ԵՐԵՎԱՆ, 7 հոկտեմբերի. /Նովոստի-Արմենիա/. 2012 թ.-ին նշվող հայկական տպագրության հիմնադրման 500-ամյա հոբելյանին նվիրված եռօրյա գիտաժողովն է հինգշաբթի մեկնարկել Մայր Աթոռ Սուրբ Էջմիածնում, հաղորդում է Մայր Աթոռի տեղեկատվական համակարգը:
Գիտաժողովը նվիրված է Ամստերդամի «Սուրբ Էջմիածին և Սուրբ Սարգիս Զորավար» հայկական տպարանի հիմնադրմանը (1660 թ.) և գործունեությանը:
Միջոցառմանը մասնակցում են Մայր Աթոռ Սուրբ Էջմիածնի միաբանները, շուրջ քսան գիտնականներ, ովքեր ներկայացնում են Հայաստանի և արտասահմանի գիտակրթական հաստատությունները:
«Ամստերդամում հաստատված տպագրատունն իր ընթացքով և արգասիքներով հայ տպագրության տարեգրության մեջ լուսավոր և կարևորագույն հանգրվաններից է», - գիտաժողովի բացման ժամանակ ասել է Մայր Աթոռ Սբ. Էջմիածնի արխիվի տնօրեն Տ. Ասողիկ քահանա Կարապետյանը:
Նրա խոսքերով՝ 500-ամյա հոբելյանին հայ ժողովուրդն ընդառաջ է գնում ոչ միայն անցյալի կարևոր դրվագները լոկ խոսքերով արժեքավորելով, այլև ստեղծագործական ու հրատարակչական նորանոր մնայուն ավանդներով:
Հայկական գրատպության սկիզբը համարվում է 1512թ.-ը, երբ Վենետիկում Հակոբ Մեղապարտը հրատարակել է առաջին հայկական «Ուրբաթագիրքը»: Մեղապարտի տպագրած գրքերի վերջում կա տպարանանիշ, որ խաչակիր շրջանակ է՝ երկգիծ քառակուսու մեջ: Հակոբ Մեղապարտը ջանացել է իր տպագրած գրքերը նմանեցնել ձեռագրերի, քանի որ այն ժամանակ տպագիր գրքերն անսովոր էին հայերի մեջ: Մեղապարտի գործունեության շնորհիվ հայոց լեզուն Ասիայի և ԱՊՀ ժողովուրդների մեջ գրատպության առաջին լեզուն դարձավ:
Հակոբ Մեղապարտը նաև հրատարակել է «Պատարագատետր» և «Աղթարք» գրքերը: Հատուկ հետաքրքրություն է ներկայացնում «Տաղարանը», որը բաղկացած է միջնադարյան հայ բանաստեղծների ստեղծագործություններից (Հովհաննես Թլկուրանցի, Ֆրիկ, Մկրտիչ Նաղաշ), ինչպես նաև Ներսես Շնորհալու 137 բանաստեղծական հանելուկներից: 1513թ.-ին նաև հրատարակել է «Պարզատումարը»: -0-
