Հայաստանի Բյուրականի աստղադիտարանը տարածաշրջանային աստղագիտական կենտրոնի կարգավիճակ ստանալու հայտ է ներկայացրել Միջազգային աստղագիտական միություն, երեքշաբթի լրագրողներին հայտնեց Երիտասարդ աստղաֆիզիկոսների Բյուրականի միջազգային դպրոցի կազմկոմիտեի ղեկավար, Հայկական աստղագիտական միության փոխնախագահ Արեգ Միքայելյանը։
«ՄԱՄ-ը վերջերս հռչակել է աստղագիտության միջազգային զարգացման ռազմավարական ծրագիրը տասը տարվա համար, որի համաձայն՝ աշխարհն ութ տարածաշրջանների է բաժանվում, և Հայաստանը ներառված է դրանցից մեկում և կարող է հավակնել տարածաշրջանային աստղագիտական կենտրոնի կարգավիճակ ստանալուն»,- ասաց նա։
Ըստ նրա՝ Հայաստանը տարածաշրջանային աստղագիտական կենտրոն ճանաչվելու դեպքում ՄԱՄ-ի կողմից լրացուցիչ ֆինանսավորում կստանա որոշակի ծրագրերի իրականացման համար։ Միաժամանակ նաև ծրագրերի տեղական ֆինանսական աջակցություն է ենթադրվում։
«Հայաստանը հաստատված լինելու բոլոր հնարավորություններն ունի, քանի որ աստղաֆիզիկայի զարգացման մակարդակով լավագույն երկրների տասնյակի մեջ է, իսկ Բյուրականի աստղադիտարանը մեծ աստղագիտական դպրոց ունի»,- կարծում է Միքայելյանը։
Նա նշեց, որ նման կարծիքի է նաև Միջազգային աստղագիտական միության նախագահ, ականավոր աստղաֆիզիկոս Ռոբերտ Ուիլյամսը, ով հայտարարեց, որ «Բյուրականում Երիտասարդ աստղաֆիզիկոսների 32-րդ միջազգային դպրոցի անցկացումը ստեղծում է բոլոր նախադրյալները, որպեսզի Հայաստանն աստղագիտության տարածաշրջանային կենտրոն դառնա»։
Միքայելյանը նաև տեղեկացրեց, որ այս տարի Երիտասարդ աստղաֆիզիկոսների միջազգային դպրոցը՝ ՄԱՄ հովանու ներքո, Բյուրականում մասնակիցների ռեկորդային քանակ է հավաքել՝ աշխարհի 19 երկրներից 32 ուսանող, այդ թվում՝ Գերմանիայից, Ֆրանսիայից, Ռումինիայից, Հունաստանից, Իրանից, Թուրքիայից, Ռուսաստանից և Հայաստանից։ Դպրոցի աշխատանքներին մասնակցել են ոչ միայն Հայաստանի դասավանդողները, այլ նաև ԱՄՆ-ից և Բելգիայից:
«Մենք 18 հայ ուսանող-մագիստրոսների և միայն այս տարi բացառությամբ նաև բակալավրերին թույլ ենք տվել մասնակցել Միջազգային դպրոցին, որտեղ նրանց հնարավորություն է տրվել երկու շաբաթվա ընթացքում (սեպտեմբերի 12-ից մինչև հոկտեմբերի 2-ը) մասնակցել Դպրոցի աշխատանքներին և կարճ ժամանակահատվածում լրացնել իրենց գիտելիքներն աստղագիտության բնագավառում»,- նշեց նա։
Ըստ Միքայելյանի՝ մոտ ապագայում աստղագիտության ցածր մակարդակ ունեցող երկրներից (Իրան, Միացյալ Արաբական Էմիրություններ) ասպիրանտներն ու մագիստրոսները սովորելու համար Հայաստան կհրավիրվեն։
Մախորդ դպրեցները 2006 և 2008թ.-ին են կազմակերպվել։ --0--
