ԵՐԵՎԱՆ, 27 սեպտեմբերի. /Նովոստի-Արմենիա/. Գերագույն Հոգևոր Խորհուրդը` նախագահությամբ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի, դատապարտում է Ղուրանի այրման դեպքերը և այդ մասին կատարված հայտարարությունները, տեղեկացնում են Մայր Աթոռ Սուրբ Էջմիածնի տեղեկատվական համակարգից:

«Լինելով միջկրոնական ու միջեկեղեցական երկխոսությունների ջատագով` Հայոց Եկեղեցին մշտապես հարգանքով է վերաբերվում յուրաքանչյուր ժողովրդի կրոնական զգացումներին ու արժեքներին»,- ասվում է հաղորդագրության մեջ։

Սեպտեմբերի 11-ին երկու քրիստոնյա քահանաներն ամերիկյան Նեշվիլ քաղաքից ոչ հեռու իրենց բակում Ղուրանի մեկական օրինակ են այրել։ Մուսուլմանների սուրբ գիրքը սրբապղծության է ենթարկվել նաև Նյու Յորքում, որտեղ սեպտեմբերի 11-ին 2001թ.-ի ահաբեկչությունների զոհերի հիշատակին նվիրված սգո արարողություններ են անցկացվել։ Ցուցարարներից մեկը Ղուրանից մի քանի էջ է պոկել և այրել դրանք, իսկ մեկ ուրիշը սուրբ գրքից պոկված թերթերով անպարկեշտ շարժումներ է արել։ Բացի այդ, Մեծ Բրիտանիայում Ղուրանի այրման կասկածանքով վեց տղամարդ է ձերբակալվել։ -0-