Հայ-բելգիական բիզնես-ֆորումը կբացվի սեպտեմբերի 14-ին Երևանում

Հայ-բելգիական բիզնես-ֆորումը կբացվի սեպտեմբերի 14-ին Երևանում, «Նովոստի-Արմենիա» գործակալությանը հայտնեցին Զարգացման հայկական գործակալությունից։  

Ֆորումին կմասնակցեն Հայաստանի էկոնոմիկայի նախարար Ներսես Երիցյանը, Վալոնիայի արտահանման և ներդրումների գործակալության գլխավոր տնօրեն Ֆիլիպ Սյունենը, Հայաստանում Բելգիայի դեսպան Ստեփան Դե Լոքերը։ Բացի այդ, ծրագրված է 23 ընկերությունների ներկայացուցիչների մասնակցությունը։

Ինչպես տեղեկացնում է Ազգային վիճակագրական ծառայությունը, Հայաստանի և Բելգիայի արտաքին առևտրաշրջանառությունը 2010 թվականի հունվա-հուլիսին աճել է 84,7 տոկոսով 2009 թվականի նույն ժամանակահատվածի ցուցանիշի համեմատ և կազմել է շուրջ 94,1 մլն դոլար։

Միաժամանակ Հայաստանից Բելգիա արտահանման ծավալը կազմել է 50,3 մլն դոլար (Հայաստանից ողջ արտահանման 9,8 տոկոսը)՝ նշված ժամանակահատվածում աճելով 2,4 անգամ 2009 թվականի հունվար-հուլիսի ցուցանիշի համեմատ։

Հայաստան ներկրված բելգիական արտադրության ապրանքների ծավալը հաշվետու ժամանակահատվածում կազմել է 43,8 մլն դոլար՝ աճելով 44,9 տոկոսով։ Միաժամանակ, ընդհանուր առմամբ, Բելգիայի տարածքից ներկրման ծավալը կազմել է 48,1 մլն դոլար (աճը՝ 11,7 տոկոսով)։ -0-