Երևանի մետրոյի «Մարշալ Բաղրամյան» կայարան, որտեղ առավոտյան կարճ միացման հետևանքով ծուխ էր լցվել, ուղևորների մուտքը դեռ արգելվում է, հաղորդում է «Նովոստի-Արմենիա» գործակալության թղթակիցը դեպքի վայրից:
Մետրոյի «Մարշալ Բաղրամյան» կայարանում, որի դիմաց ՀՀ նախագահի նստավայրն է, ծուխ է լցվել առավոտյան ժամը 10:35-ին, և մետրոպոլիտենի աշխատակիցները տարհանվել են: Կայարանի աշխատանքը դադարեցվել է, անջատվել է էլեկտրական սնուցումը:
«Էլեկտրական սնուցման վահանակում տեղի է ունեցել կարճ միացում, առաջացել է ծուխ, որը սկսել է տարածվել: Այժմ կայարանին ոչինչ չի սպառնում», - ասաց Երևանի Կարեն Դեմիրճյանի անվան մետրոպոլիտենի տնօրեն Փայլակ Յայլոյանը:
Նրա խոսքերով՝ կայարանի նորմալ աշխատանքը կվերսկսվի 15-20 րոպեի ընթացքում:
Ինչպես «Նովոստի-Արմենիա» գործակալությանը տեղեկացրեց մետրոպոլիտենի աշխատակիցներից մեկը, նման միջադեպերը հազվադեպ են, և նմանատիպ դեպք է գրանցվել 15 տարի առաջ:
ՀՀ ԱԻՆ Փրկարար ծառայության վարչության կենտրոնական օպերատիվ բաժնի պետ Պավել Գյոզալյանը լրագրողներին տեղեկացրեց, որ միջադեպի ժամանակ կայարանում գտնվողներից ոչ մեկը չի տուժել:
Նա տեղեկացրեց, որ այժմ կայարանում ուժեղացված ռեժիմով աշխատում է օդափոխման համակարգը, և շուտով ծուխը կանցնի:-0-
