ՄԱԿ-ի Գլխավոր Վեհաժողովի բանաձևը ոչ մի կշիռ չի ունենա. պատգամավոր
ԵՐԵՎԱՆ, 6 սեպտեմբերի. /Նովոստի-Արմենիա/. ՄԱԿ-ի Գլխավոր Վեհաժողովի քննարկմանը ներկայացված ադրբեջանական բանաձևը՝ Ղարաբաղի վերաբերյալ, ոչ մի կշիռ չի ունենա, երկուշաբթի լրագրողներին ասաց ՀՀ ԱԺ Մարդու իրավունքների պաշտպանության և հանրային հարցերի մշտական հանձնաժողովի փոխնախագահ, ՀՀԿ անդամ Ռաֆիկ Պետրոսյանը:
Ադրբեջանը սեպտեմբերի 9-ին ՄԱԿ-ի ԳՎ 65-րդ նստաշրջանում քվեարկության կներկայացնի «Միջազգային հումանիտար օրենքի և միջազգային չափորոշիչների նորմերի պահպանումը մարդու իրավունքների ոլորտում Ադրբեջանի բռնազավթված տարածքներում» բանաձևի օրինագիծը։
«Ադրբեջանն անարդյունավետ նախաձեռնությամբ է հանդես գալիս, քանի որ բոլոր գերտերությունները կարծում են, որ ղարաբաղյան հակամարտությունը պետք է ԵԱՀԿ Մինսկի խմբի շրջանակներում լուծվի, այդ պատճառով էլ բանաձևը դատապարտված է, և արժանի չէ այն թղթին, որի վրա գրված է»,- ասաց Պետրոսյանը:
Ըստ նրա, ՄԱԿ-ի Գլխավոր Վեհաժողովի կողմից ընդունված բանաձևերն իրավական ակտեր չեն, այլ ընդամենը՝ քաղաքական, ինչի պատճառով էլ իրական կշիռ չունեն համաշխարհային քաղաքականության մեջ:
Միաժամանակ, ինչպես կարծում է պատգամավորը, տվյալ փաստաթուղթը չի ներկայացվի ՄԱԿ-ի անվտանգության խորհրդի դիտարկմանը:
«Ժառանգություն» խորհրդարանական խմբակցության քարտուղար, ՀՀ նախկին օմբուդսմեն Լարիսա Ալավերդյանն էլ ասաց, որ ՄԱԿ-ի բանաձևի նկատմամբ նման անլուրջ վերաբերմունքն անթույլատրելի է:
«ՄԱԿ-ի բոլոր որոշումները քաղաքական բնույթ են կրում և ամուր հիմք են ստեղծում Ադրբեջանի հետագա քաղաքականության համար»«- ասաց նա՝ ընդգծելով, որ ՄԱԿ-ի կողմից Հայաստանի և Ղարաբաղի վերաբերյալ արդեն մի քանի նման բանաձևեր են ընդունվել:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ, և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
