Տաթևում գտնվող աշխարհի ամենաերկար ճոպանուղու փորձարկումները կսկսվեն սեպտեմբերի կեսերին

ԵՐԵՎԱՆ, 31. /Նովոստի-Արմենիա/. Տաթև վանական համալիր տանող աշխարհի ամենաերկար ճոպանուղու փորձարկումները կսկսվեն սեպտեմբերի կեսերին, երեքշաբթի լրագրողներին ասաց Հայաստանի ազգային մրցունակության հիմնադրամի հասարակայնության հետ կապերի բաժնի ղեկավար Զառա Ամատունին:

«Ճոպանուղին արդեն պատրաստ է, անհրաժեշտ բոլոր կոնստրուկցիաները հավաքված են, և 20 օրվա ընթացքում կսկսվեն ճոպանուղու փորձարկումները: Այժմ ընթանում են հարակից տարածքի բարեկարգման աշխատանքները», - տեղեկացրեց Ամատունին:

Նրա խոսքերով՝ ճոպանուղու մոտակայքում կկառուցվի հատուկ ավտոկայանատեղի, Armenian Tree Project կազմակերպության հետ համատեղ մերձակա տարածքի կանաչապատման աշխատանքներ կիրականացվեն: Ամատունին տեղեկացրեց, որ մոտ օրերս կսկսվեն տարածքի մաքրման աշխատանքները:

Նրա խոսքերով՝ ճոպանուղու կառուցման վրա ծախսվել է 13 միլիոն դոլար, որոնք տրամադրել է «Ռուբեն և Վերոնիկա Վարդանյաններ և ընկերներ» հիմնադրամը, որում ավելի քան 100 մեկենաս է ներառված:

Միաժամանակ Ամատունին պարզաբանեց, որ 5,7 կմ երկարություն ունեցող Տաթևի ճոպանուղին կդառնա աշխարհի ամենաերկար ռևերսային ճոպանուղին: Նա ավելացրեց, որ մինչև այս ճոպանուղին շուրջ 4 կմ երկարություն ունեցող աշխարհի ամենաերկար ռևերսային ճոպանուղին գտնվում էր Սանտա Ֆեում:

Ճոպանուղու կառուցումը 45-50 միլիոն դոլար արժողությամբ «Տաթևի վերածնունդ» ծրագրի մի մասն է:

«Տաթևի վերածնունդ» ծրագիրը Հայաստանի ազգային մրցունակության հիմնադրամի առաջահերթ նախաձեռնությունն է, որը հիմնված է պետության և մասնավոր հատվածի համագործակցության վրա:

Ճոպանուղու բացումը նախատեսված է հոկտեմբերի 16-ին: Տաթև վանահամալիր տանող ճոպանուղու կառուցման պայմանագիրը ստորագրվել է Երևանում 2009 թ.-ի հուլիսի 14-ին:

Տաթևի վանքը խոշոր մշակութային կենտրոն է եղել՝ ձեռագրատնով, արհեստանոցով, գրադարանով և ամենահայտնի համալսարաններից մեկով։ -0-