ՀՀ կառավարությունը 2011թ.-ին կքննարկի աշխատանքային միգրանտների իրավունքների պաշտպանության մասին օրինագիծը, երկուշաբթի մամուլի ասուլիսի ժամանակ ասաց ՀՀ պետական միգրացիոն ծառայության պետ Գագիկ Եգանյանը։
Միգրացիոն ծառայության տվյալների համաձայն՝ Հայաստանից աշխատանքային միգրանտների թիվը 1-1,2 մլն մարդ է կազմում, որոնցից 600-700 հազարը երկարաժամկետ աշխատանքային միգրանտներն են, իսկ 80 հազարը՝ սեզոնային։ Միաժամանակ Հայաստանից աշխատանքային միգրանտների շուրջ 94 տոկոսը Ռուսաստանին է բաժին ընկնում։
«Աշխատանքային միգրանտների և նրանց ընտանիքների պաշտպանությունը մեր պետության առաջնահերթ խնդիրներից մեկն է։ Չէ՞ որ մենք չպետք է մոռանանք, որ այս խնդիրը սերտորեն կապված է աշխատանքային միգրացիայից հանրապետություն եկող տրանսֆերտների հետ, որը ՀՆԱ շուրջ 20 տոկոսն է կազմում»,- ասաց Եգանյանը։
Ըստ նրա՝ օրինագծի հիմնական նպատակն է օրենսդրաական մակարդակում Հայաստանի ներսում աշխատանքային միգրանտների իրավունքների պաշտպանությունը, որը թույլ կտա ոչ միայն նրանց իրավունքները պաշտպանել, այլ նաև լիարժեք տեղեկատվություն տրամադրել երկրի պոտենցիալ աշխատանքային միգրանտներին։
Սակայն Եգանյանը նշեց, որ բացառապես ներպետական մակարդակում դժվար է պայքարել խնդիրների դեմ, որի կապակցությամբ հատուկ կարևորություն ունի երկկողմանի պայմանագրերի կնքումն ու միջազգային կոնվենցիաների վավերականացումը։
Տվյալ համատեքստում նա նշեց, որ միգրացիոն ծառայությունն աշխատանքային միգրանտների և նրանց ընտանիքների իրավունքների պաշտպանության մասին կոնվենցիային միանալու վերաբերյալ արդեն հայց է ներկայացրել ՀՀ ԱԳՆ: Փաստաթուղթն ընդունվել է 1990թ.-ի դեկտեմբերի 18-ին ՄԱԿ-ի կողմից, դրան արդեն ավելի քան 43 երկիր է միացել։
Նա նշեց, որ թեև Հայաստանը դեռ չի վավերացրել տվյալ կոնվենցիան, սակայն երկրում արդեն մի շարք միջազգային փաստաթղթեր են ընդունվել, այդ թվում նաև Աշխատանքի միջազգային կազմակերպությունների շրջանակներում (ԱՄԿ)։
Միաժամանակ, ինչպես կարծում է Եգանյանը, Հայաստանը դժվար թե մինչև 2010թ.-ի վերջը հասցնի վավերացնել այդ փաստաթուղթը։
«Դա երկարատև գործընթաց է, որը պետք է տարբեր փուլեր անցնի, այդ թվում՝ քննարկում Սահմանադրական դատարանում և Ազգային ժողովում։ Սակայն այդ իրավիճակում կարևոր է այն, որ գործընթացը սկսվել է»,- ասել է Եգանյանը։
Միաժամանակ ՄԱԿ-ի միջազգային միգրացիոն իրավունքի հարցերով գլխավոր վարչության ծրագրերի պատասխանատու Պաոլա Պաչեն նշեց, որ Աշխատանքային միգրանտների և նրանց ընտանիքների իրավունքների պաշտպանության կոնվենցիայի ընդունման 20-ամյակի կապակցությամբ ՄԱԿ-ն աշխարհի բոլոր երկրներում, որոնք դեռ չեն վավերացրել փատաթուղթը, քարոզչություն է անցկացնում։
«Հուսով եմ, որ այս տարի Հայաստանը նույնպես կվավերացնի հայեցակարգը»,- ասաց Պաչեն։
ՄԱԿ-ի փորձագետների գնահատականի համաձայն՝ 1991թ.-ից սկսած Հայաստանից 700 հազարից 1,3 մլն մարդ է արտագաղթել։ -0-
