Հայազգի թիկնապահը փրկել է Սաուդիան Արաբիայի արքայադստեր կյանքը. թերթ

ԵՐԵՎԱՆ, 17 հուլիսի. /Նովոստի-Արմենիա/. Թիկնապահ Սարգիս Թոքաթլյանը փրկել է Սաուդիան Արաբիայի արքայադուստր Սառա Ալ-Ամուդիի կյանքը, ում փորձել է խեղդել նրա սիրեցյալը, գրում է «Չորրորդ ինքնիշխանություն» թերթը:

Ըստ թերթի, արքայադստեր սիրեցյալը՝ ազգությամբ շվեդ Պատրիկ Ռիբսետերը, ով աշխարհահռչակ ապրանքանիշներ Armani-ի, Gucci-ի, Calvin Klein-ի, Christian Dior-ի մոդել է, որոշել է խեղդել Ալ-Ամուդիին՝ իմանալով, որ վերջինը պատրաստվում է խզել հարաբերությունները նրա հետ:

Ռիբսետերը ծանոթացել է արքայադստեր հետ Թայլանդում, և նրանց մոտ սիրավեպ է սկսվել: Սակայն որոշ ժամանակ անց Ալ-Ամուդին հայտնաբերել է, որ Ռիբսետերը դավաճանում է նրան: Բռնկված վեճից հետո արքայադուստրը հայտարարել է, որ խզում է հարաբերությունները մոդելի հետ:

«Շվեդը, գիտակցելով, որ մեծ կարողություն է կորցնում, փորձել է խեղդել արքայադստերը, սակայն նրա թիկնապահը կարողացել է ժամանակին միջամտել և փրկել Ալ-Ամուդիի կյանքը», - գրում է թերթը:

Միաժամանակ Թոքաթլյանը վիրավորվել է, Ռիբսետերը պայքարի ժամանակ կոտրված շշի կտորներով վեց անգամ հարվածել է նրան:-0-