Մարմարաշեն գյուղի բնակիչը կորցրել է ձեռքը գազալցակայանում տեղի ունեցած պայթյունի հետևանքով
Մարմարաշեն գյուղի մի երիտասարդ բնակիչ գազալցակայանում գազի բալոնի պայթյունի հետևանքով կորցրել է ձեռքը, հաղորդում է ՀՀ ԱԻՆ փրկարար ծառայությունը:
Տեղեկատվության համաձայն` նախօրեին երեկոյան ՀՀ ԱԻՆ փրկարար ծառայություն տեղեկատվություն է ստացվել այն մասին, որ Մասիս-Մարմարաշեն ավտոճանապարհի 1-ին կիլոմետրում գտնվող գազալցակայանում տեղի է ունեցել «ԳԱԶ-53» մակնիշի բեռնատար ավտոմեքենայի բարձր ճնշման գազի բալոնի պայթյուն:
Մասիս քաղաքից անհապաղ դեպքի վայր է մեկնել հրշեջ-փրկարարական ջոկատի մեկ մարտական հաշվարկ:
Ինչպես պարզվել է, պայթյունի հետևանքով վարորդը` Մարմարաշեն գյուղի բնակիչ, 30-ամյա Արթուր Գալստյանը, ձախ ձեռքի անդամահատումով տեղափոխվել է Մասիսի հիվանդանոց, այնուհետև Երևանի Հերացու անվան թիվ 1 համալսարանական հիվանդանոց:
Ըստ բժիշկների` տուժածի վիճակը գնահատվում է բավարար:
Դեպքի մասին տեղեկացվել է ՀՀ ԱԻՆ Տեխնիկական անվտանգության ազգային կենտրոնը:-0-