Հայաստանը ծրագրում է մինչև տարեվերջ մշակել սահմանային անվտանգության հայեցակարգը, երկուշաբթի լրագրողներին հայտնեց ՀՀ ազգային անվտանգության խորհրդի ազգային անվտանգության ռազմավարության իրականացման վարչության պետ Արամ Թանանյանը։
«Սահմանային անվտանգության ապահովումը մեր պետության, մեր ազգային անվտանգության առաջնահերթություններից մեկն է և բխում է ազգային անվտանգության հայեցակարգից, ինչը բնական է, որ իր լուրջ տեղն ունի երկրի անվտանգության, նրա տարածքային ամբողջականության ապահովման գործում»,- ասաց նա։
Թանանյանը նշեց, որ հենց այդ նպատակով էլ ՀՀ ազգային անվտանգության խորհրդի կողմից որոշում է ընդունվել մշակել սահմանային անվտանգության հայեցակարգը, որտեղ պետք է արտացոլվեն պետական սահմանի պահպանման, ժամանակակից համալիր կառավարում կազմակերպելու մոտեցումները։
Ըստ նրա,ՀՀ ազգային անվտանգության խորհրդի քարտուղար Արթուր Բաղդասարյանի գլխավորությամբ արդեն ստեղծվել է միջգերատեսչական հանձնաժողով, որը կզբաղվի այդ հայեցակարգի մշակմամբ։
Միաժամանակ նա ավելացրեց, որ հայեցակարգի մշակման ժամանակ սերտ համագործակցություն է ծրագրվում միջազգային փորձագետների հետ՝ ինչպես Եվրամիության խորհրդակցական խմբի, այնպես էլ ՄԱԿ-ի փորձագետների հետ։
Թանանյանն ասաց, որ հայեցակարգի մշակումը բարդանում է նրանով, որ Հայաստանի սահմանները շատ տարբեր են, օրինակ, Իրանի կամ Վրաստանի հետ սահմանը բոլորովին նման չէ Թուրքիայի հետ սահմանին։
Բացի այդ, նա նշեց արցախյան ազատագրական պատերազմի արդյունքում ձևավորված սահմանի մեծ հատվածը, որը գտնվում է Պաշտպանության նախարարության տնօրինության տակ։
Թանանյանն ընդգծեց, որ հայեցակարգը կհամապատասխանի այդ ոլորտում եվրոպական մոտեցումներին, բայց միաժամանակ կբխի Հայաստանի ազգային շահերից և արդեն դրա հիման վրա կմշակվի սահմանային անվտանգության և սահմանի համալիր պահպանման ամրապնդման միջոցառումների ծրագիրը։
ԱԱԽ ներկայացուցիչը նաև ավելացրեց, որ սահմանային ժամանակակից համակարգի ստեղծման գործում կարևոր դեր պետք է խաղա Եվրամիության ինչպես խորհրդակցական և կազմակերպչական, այնպես էլ ֆինանսական օգնությունը։
Նա նշեց, որ մոտավոր գնահատականներով սահմանային ժամանակակից համակարգի ստեղծումը մի քանի տասնյակ միլիոն դոլար կպահանջի։ -0-
