ԵՐԵՎԱՆ, 16 հունիսի. /Նովոստի-Արմենիա/. Հայաստանում Սահմանադրական դատարանի հիմնադրման 15-ամյակի կապակցությամբ անցկացվող միջոցառումների շրջանակում Սահմանադրությանը վերաբերող գիտագործնական մեկնաբանությունների առաջին ժողովածուի շնորհանդեսն է անցկացվել։
«Ցանկացած երկրում օրենքների վերաբերյալ մեկնաբանություններն անհրաժեշտություն են, ցավոք, Հայաստանում այդ ավանդույթը ձևավորված չէ»,- ասաց Հայաստանի ՍԴ նախագահ Գագիկ Հարությունյանը՝ հույս հայտնելով, որ դա նախադեպ կծառայի այլ օրենքների նկատմամբ մեկնաբանությունների ստեղծման համար։
Ըստ նրա, շուրջ 68 իրավագետ, պրակտիկներ և տեսաբաններ, այդ թվում պետական կառույցներից, մեկ տարուց ավելի աշխատել են Սահմանադրության մեկնաբանությունների հատորի ստեղծման ուղղությամբ։
«Ժողովածուում ներկայացված է ինչպես գործնական փորձը, այնպես էլ տեսական ամփոփումները՝ նկատի առնելով համաշխարհային զարգացումները»,- ասաց ՍԴ ղեկավարը։
Սահմանադրական մեկնաբանություններին զուգընթաց, Հարությունյանի խոսքերով, աշխատությունում ներկայացվել է նաև ՍԴ մոտեցումն իրավական տարբեր նորմերին, ինչը հավասարազոր է պաշտոնական մեկնաբանություններին։
Հարությունյանը նշեց ժողովածուի պարբերաբար հրապարակման անհրաժեշտությունը՝ Հայաստանում սահմանադրականության և իրավական մտածողության զարգացմանն օժանդակելու նպատակով։
Հարությունյանի կարծիքով, Հայաստանում որոշակի անհամապատասխանություն է նկատվում Սահմանադրության և իրավական կյանքի միջև։
«Այս աղավաղման հաղթահարումը պետք է ընդգրկվի պետական քաղաքականության օրակարգում, հակառակ դեպքում Սահմանադրության գերակշռման երաշխիքը միայն վերացականություն կմնա»,- ասաց նա։
Իր հերթին ԵԱՀԿ երևանյան գրասենյակի ղեկավար Սերգեյ Կապինոսն ընդգծեց այնպիսի ժողովածուի հրապարակումը, որը «հասկանալի և հասանելի է դարձնում հիմնական օրենքը հասարակ քաղաքացիների համար, ինչը շատ կարևոր է»։
Ժողովածուն հրապարակվել է ԵԱՀԿ երևանյան գրասենյակի և գերմանական GTZ կազմակերպության աջակցությամբ։
Ժողովածուի առաջին օրինակներից հանձնվել են հանրապետության նախագահ Սերժ Սարգսյանին և կառավարության ղեկավար Տիգրան Սարգսյանին։ -0-
