Վահան Խալաֆյանի ինքնասպանության քրեական գործի շրջանակներում մեղադրանք է ներկայացվել ՀՀ ոստիկանության Չարենցավանի բաժնի քրեական հետախուզության բաժանմունքի պետին և երեք օպերլիազորներին, չորեքշաբթի հաղորդում է ՀՀ հատուկ քննչական ծառայությունը (ՀՔԾ):
Գողություն կատարելու կասկածանքով ապրիլի 13-ին ՀՀ ոստիկանության Չարենցավանի բաժին բերման ենթարկված Վահան Խալաֆյանը հարցաքննության ժամանակ ինքնասպանություն է գործել:
«ՀՔԾ-ն ավարտել է ՀՀ ոստիկանության Չարենցավանի բաժնում Վահան Խալաֆյանի ինքնասպանության դեպքի առթիվ քննվող քրեական գործի նախաքննությունը: Նախաքննությամբ ձեռք բերված ապացույցների հիման վրա ՀՀ ոստիկանության Չարենցավանի բաժնի քրեական հետախուզության բաժանմունքի պետ Ա. Հարությունյանին մեղադրանք է առաջադրվել ՀՀ քրեական օրենսգրքի 309-րդ հոդվածի 3-րդ մասով (պաշտոնական լիազորությունները անցնելը, որն անզգուշությամբ առաջացրել է ծանր հետևանքներ)», - նշվում է տեղեկատվության մեջ:
ՀՔԾ-ն նաև մեղադրանք է ներկայացրել նույն բաժանմունքի ավագ օպերլիազորներ Գ.Դավթյանին, Գ.Ղազարյանին և օպերլիազոր Մ. Հայրապետյանին` ՀՀ քրեական օրենսգրքի 308-րդ հոդվածի 1-ին մասով (պաշտոնական լիազորությունների չարաշահում):
Քրեական գործի նյութերն օրենքով նախատեսված կարգով տրամադրվել են կողմերին՝ ծանոթանալու համար:
Բացի այդ, ՀՀ քրեական դատավարության օրենսգրքի 200-րդ հոդվածի հիման վրա ՀՀ հատուկ քննչական ծառայությունը միջնորդագիր է ներկայացրել ՀՀ կառավարությանն առընթեր ոստիկանության պետ Ալիկ Սարգսյանին՝ ՀՀ ոստիկանության Չարենցավանի բաժնում հիշյալ դեպքի հետ կապված խախտումները և հանցանքի կատարմանը նպաստող հանգամանքները վերացնելու ուղղությամբ:
Խալաֆյանի մահը մեծ արձագանք է առաջացրել հայկական հասարակության շրջանում: ՀՀ գլխավոր դատախազ Աղվան Հովսեփյանը այս դեպքը արտակարգ պատահար է որակել:-0-
