Թուրքիան փորձում է թուլացնել Հայաստանի դիրքերը համաշխարհային հանրության աչքում. ՀՅԴ խմբակցության ղեկավար

Թուրքիան Ռուսաստանի, Իրանի և արաբական աշխարհի հետ իր մերձեցմամբ փորձում է խախտել աշխարհում Հայաստանի հիմքերը, կարծում է Դաշնակցություն խորհրդարանական  խմբակցության ղեկավար Վահան Հովհաննիսյանը:

«Թուրքիան հասկացել է, որ իրեն չի հաջողվել միանգամից ծնկի բերել Հայաստանին, և այժմ նա փորձում է թուլացնել Հայաստանի դիրքերը միջազգային կառույցներում, դաշնակցային կապերում», - հայտարարել է նա «Նովոստի-Արմենիա» գործակալությանը:

Հովհաննիսյանի խոսքերով՝ գործելով շատ հմուտ և խելամիտ՝ Թուրքիան ձգտում է ազդել նաև հայ հասարակության վրա՝ փորձելով թուլացնել այն:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։

ՀՀ նախագահ Սերժ Սարգսյանի նախաձեռնությամբ 2008 թ.-ի աշնանը սկսվել է հայ-թուրքական հարաբերությունների կարգավորման գործընթացը: Հայաստանի ու Թուրքիայի արտգործնախարարները 2009 թ.-ի հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

Սակայն 2010 թ.-ի ապրիլի 22-ին Սարգսյանը հրամանագիր է ստորագրել հայ-թուրքական արձանագրությունների վավերացման գործընթացը կասեցնելու մասին՝ հայտարարելով, որ Թուրքիան պատրաստ չէ շարունակել սկսած գործընթացը:-0-