Հայաստանում անհրաժեշտ է օտար լեզվի ուսուցման թեքումով դպրոցներ բացել, այդ կարծիքին է Հայաստանի Ժողովրդական կուսակցության նախագահ Ստեփան Դեմիրճյանը։
ՀՀ կրթության և գիտության նախարարությունը լեզվի և հանրակրթության ոլորտում օրենսդրական փաթեթ է մշակել, որը թույլ կտա հայկական դպրոցներում ներդնել օտարալեզու կրթությունը՝ բուհական համակարգում գործող համանման համակարգի նմանությամբ։ Դա դժգոհություն է առաջացրել հասարակության որոշ շրջանակներում։
«Անհրաժեշտ է խրախուսել ինչպես ռուսերեն, այնպես էլ անգլերեն և այլ օտար լեզուների ուսուցումը, սակայն դա առավել ճիշտ կլինի անել թեքումով դպրոցների միջոցով»,- չորեքշաբթի լրագրողներին ասաց Դեմիճյանը։
Միաժամանակ ՀԺԿ առաջնորդը նշեց, որ ընդհանուր առմամբ Հայաստանի հանրակրթական համակարգում բազմաթիվ խնդիրներ կան։
«Ամեն մի նախարար այս ոլորտը սկսում է իր ճաշակով բարեփոխել։ Այս համակարգը փորձերի համակարգ է դարձել»,- ընդգծեց նա։
Այսօր Հայաստանում գործում է ավելի քան 1450 դպրոց, որոնցից երկուսը ռուսական են, սակայն այդտեղ կարող են սովորել միայն ՌԴ քաղաքացիներն ու ծագումով ոչ հայերը։ -0-
