Հայաստանը եղել է, կա և կլինի քաղաքակրթությունների երկխոսության և անվտանգության տարածաշրջանային համակարգի կառուցման հետևողական կողմնակիցը, երեքշաբթի Երևանում ասաց ՀՀ արտգործնախարարի տեղակալ Շավարշ Քոչարյանը:
«Իրավիճակը բարդանում է տվյալ տարածաշրջանում արտաքին ակտորների փոխադարձաբար բացառող կամ հակասական շահերով: Ընդհանուր առմամբ, կարելի է երկու հեռանկարների մասին խոսել, առաջինը՝ ընդհանուր անվտանգության տարածաշրջանային համակարգի ստեղծումն է՝ համաշխարհային համակարգում ինտեգրված և մշակույթի ու քաղաքակրթության երկխոսության վրա հիմնված, իսկ երկրորդը՝ տարածաշրջանը մշակույթների և քաղաքակրթությունների բախման հարթակի փոխակերպելն է»,- ասաց Քոչարյանը՝ ելույթ ունենալով «Կովկասի իրավիճակն ու տարածաշրջանային անվտանգության հեռանկարները» միջազգային խորհրդաժողովին:
ԱԳՆ ղեկավարի տեղակալը նշեց, որ տարածաշրջանի անվտանգության և Կովկասի կայունության հեռանկարների մասին խոսելիս՝ պետք է հաշվի առնել, որ խոսքը գնում է բարդագույն էթնոքաղաքական տարածաշրջանի մասին:
«Այստեղ առկա են ամենազանազան միտումները: Պայմանականորեն դրանք երեքն են՝ տարածաշրջանային անվտանգության համակարգի աջակցումը, տարածաշրջանային անվտանգության կիրառումը և տարածաշրջանային անվտանգության համակարգի վիժեցումը»,- ասաց նա՝ ավելացնելով, որ այս կամ այն համակարգի գերակշռումը կախված է պետության կարգավիճակից:
Ըստ Քոչարյանի, այդ միտումներն իրենց հերթին հիմնվում են զանազան արժեհամակարգերի վրա:
«Մեկը՝ քաղաքակրթական ինքնաբավարարումը կամ դրա զգացողությունն է, երկրորդը՝ քաղաքակրթական ներուժի կիրառումն է, իսկ երրորդը՝ քաղաքակրթական ինքնաբավարարման իմիտացիան է»,- ասաց նա: -0
