Հայաստանը մինչև հունիսի վերջ Ճապոնիայից 28 հրշեջ մեքենա կստանա. ԱԻՆ

Հայաստանի արտակարգ իրավիճակների նախարարությանն առընթեր Փրկարար ծառայությունը մինչև հունիսի վերջ 28 հրշեջ մեքենա կստանա Ճապոնիայից, երեքշաբթի լրագրողներին հայտնեց Ծառայության տնօրեն, գեներալ-լեյտենանտ Էդիկ Բարսեղյանը։

«Ինձ զեկուցեցին, որ դրանք արդեն Կոբե քաղաքի նավահանգստում են... Եվ ամենաուշը հաջորդ ամսվա վերջին մեքենաները կլինեն Հայաստանում»,- ասաց նա՝ ավելացնելով, որ ծրագրի ընդհանուր արժեքը կազմում է 8 մլն դոլար։

Բարսեղյանը հայտնեց, որ այդ մեքենաներից հինգը զինված են 10 հազար լիտր տարողությամբ, 19-ը՝ 3,5 հազար լիտր, երկուսը՝ հազար լիտր, մյուս երկուսը զինված են հատուկ շարժասանդուղքով։

Մեքենաները կփոխանցվեն Փրկարար ծառայությանը Ճապոնիայի միջազգային համագործակցության գործակալության (JICA) և Հայաստանի արտակարգ իրավիճակների նախարարության միջև համաձայնագրի շրջանակներում։ -0-